13 марта 2018 г.
Çак кун Улянкă ялĕнчи хĕрарăмсемшĕн чылай вăхăтлăха асра юлĕ, мĕншĕн тесен ялти культура çуртĕнче Пĕтĕм тĕнчери хĕрарăмсен кунĕ ячĕпе пысăк уяв концерчĕ пулчĕ. Ялти культура çурчĕ çумĕнчи хĕрарăмсен “Мерчен” ушкăнĕ тата Йăнтăрчă ялĕнчи культура çурчĕ çумĕнчи пултарулăх ушкăнĕ хитре те çепĕç, хаваслă юрăсемпе савăнтарчĕç уява килнĕ çынсене.
Концерта Ираида Евдокимова чун-чĕререн тухакан чи ăшă та çепĕç сăмахсемпе саламласа уçрĕ. Уяв программинче ытларах аннесене, хĕрупраçпа хĕрарăмсене халалланă юрăсем шăранчĕç. Галина Тимофеева анне çинчен хăй çырнă сăввине вуланă чухне куракансен куçĕсем шывланчĕç. “Мерчен” ушкăнри хĕрарăмсем вара ача садĕнчи пĕчĕк ачасем пек пулса “Сегодня мамин праздник” юрра шăрантарса куракансене култарчĕç.
Шкул ачисем хитре ташăсем парнелерĕç курма килнĕ çынсене. Глеб Архипов ?Йăнтăрчă ялĕ/ аннене халалланă сăвва питĕ хитре вуласа пачĕ, Мария Садовина ?Улянкă ялĕ/ асанне çинчен сăвă парнелерĕ куракансене. “Артист пекех тытрĕç вĕсем хăйсене, пĕчĕк пулсан та”, - терĕç.
Пĕтĕм концерт тăршшĕпех алă çупса тав турĕç ял артисчĕсене куракансем.
Улянкăри артистсем вара Йăнтăрчă ялне çитсе унти ял çыннисене те хăйсен уяв программипе савăнтарчĕç.
Источник: "Ял ĕçченĕ"