11 октября 2016 г.
Ку статьяра манăн сăмахăм Анна аппапа унăн мăшăрĕ çинчен пырĕ. Анна аппа Йăнтăрчă ялĕнчи хресчен çемйинче 1940 çулхи авăн уйăхĕнче çуралнă. Çемьере иккĕмĕш хĕр пулнă вăл. Пурĕ вара виççĕн ỹснĕ: унсăр пуçне аппăшĕпе шăллĕ пур. Анна аппан ашшĕ Тăван çĕршывăн Аслă вăрçинчен 1946 çулта чирлесе килет, килте вилет. Амăшĕ унран виçĕ ачапа юлать, ĕмĕрне колхозра ĕçлесе ирттерет, вăл 1915 çулхи. Пирĕн Анна аппа ялти шкула çỹресе çичĕ класлă пĕлỹ илет. Пĕве çитсе пынă май, Кĕршери кирпĕч заводĕнче, унтан тăван хуçалăхри сысна ферминче ĕçлет, сыснасем самăртать. Пĕлĕвне тарăнлатса, иртнĕ ĕмĕрхи утмăлмĕш çулсен пуçламăшĕнче кассир-счетовода вырнаçать те мĕн пенсие тухичченех çав ĕçре тăрăшать. Тивĕçлĕ канăва 55-ре тухнă вăл.
Халĕ вăл çитмĕл улттăра. Йăнтăрчă каччипе, Геннадий Федоровичпа, 1964 çултанпа пĕрле пурăнаççĕ. Виçĕ ача çуратса çитĕнтернĕ вĕсем. Ачисем те хăйсем пекех сывă та ĕçчен.
Анна Федоровнапа Геннадий Федорович Федоровсем 52 çул ĕнтĕ пĕр-пĕринпе шăкăл-шăкăл калаçса, чипер, типтерлĕ пурнăçпа пурăнаççĕ. Çĕрулми, пахчаçимĕç, улма-çырла туса илеççĕ. Кил картинче хур-кăвакалсăр, чăх-чĕпсĕр пурăнмаççĕ. Халиччен ĕне выльăх та тытнă.
Геннадий Федорович 4 çул Германире çар службинче пулнă. Унтан килсен шоферта та, трактористра та ĕçленĕ. Орденпа та чысланă ăна. Каярахпа йĕтемре тырă сортланă, сортировкăсене йĕркелесе тăнă вăл. Пĕр вăхăт ферма сукмакне те такăрлатнă, унта та ĕç панă ăна.
Асăнтăм ĕнтĕ, пилĕк теçетке ытла çемьеленсе пĕрле пурăнаççĕ Федоровсем. Ачисене, мăнукĕсене пулăшаççĕ. Пĕр хĕрпе икĕ ывăлĕ те ялтах тĕпленнĕ. Хăйсен çемье, хăйсен хуçалăх вĕсен. Федоровсем кỹршисемпе те, тăванĕсемпе те лайăх, килĕштерсе пурăнаççĕ. Кăмăллă та харсăр çынсем вĕсем, яланах пулăшма хатĕр пурне те. Ăшă кăмăлпа тарават кĕтсе илсе, хăналамасăр, сĕтел çине апат лартмасăр ямаççĕ килĕнчен. Унсăр пуçне Анна аппа юрра-ташша та маттур, хăй савăнма кăна мар тата çынсене те савăнăç кỹме пĕлет. Вĕсен хăйсен те, ачисен те тума пĕлмен ĕç çук. Статьяна вĕçленĕ май, Федоровсен çемйине ырă кăна сунас килет, телей те вăрăм ĕмĕр вĕсене.
Е.АНДРЕЕВА, Йăнтăрчăри культорганизатор.
Источник: "Ял ĕçченĕ"