23 июня 2016 г.
Тенеялĕнчи куллен кирлĕ таварсен магазин заведующине Зоя Михайловна Андреевана çак кунсенче ĕçтешĕсем, çывăх çыннисемпе тăванĕсем 60 çул тултарнă ятпа саламланă. "Тăвайри кооператив" потребобщество Хисеп грамотипе пилĕк пин тенкĕлĕх парне илме сертификат парса чысланă.
...Зоя - Тăвай хĕрĕ. Ачаранах ĕçе хăнăхнă. Ялсенче Йăла çурчĕсен (КБО) комплекслă йышăну пункчĕсем уçăлсан Зоя Михайловна унта ĕçлеме тытăннă. Ял çыннисен ыйтăвĕсене туллин тивĕçтернĕшĕн 20 çул хушшинче темиçе хутчен те тав хучĕсемпе Хисеп грамотисене тивĕçнĕ. Самана улшăнăвне пула ялсенчи пунктсем пĕрин хыççăн тепри хупăнса пынă. Зоя Андрееван та тивĕçтерỹ ĕçĕпе сывпуллашма тивнĕ.
"Ĕç çулĕ "Новый путь" колхоз фермине илсе çитерчĕ. Пилĕк çул сыснасем пăхнă çĕрте ĕçлерĕм", - каласа парать вăл. Шăпа тени 2002 çулта тепĕр хут тивĕçтерỹ сферине тавăрнă ăна. Хастарскере ялти магазин заведующийĕн ĕçне шаннă.
"Пенсие тухни пилĕк çул çитрĕ. Пирĕн ĕçе хисеплеççĕ. Эльвира Петровна Ахтямовапа килĕштерсе ĕçлетпĕр. Кун иртни те сисĕнмест. Условисем лайăх халĕ. Лавккана юсанă. Хăтлă, ăшă. Шывĕ те, туалечĕ те шалтах. Халĕ магазинта çынсене таварсене хăйсем суйламалла туса парасшăн, - калаçу çăмхине сỹтет малалла.
Зоя Михайловна культура çуртне çỹреме те вăхăт тупать. Уявсене, концертсене хутшăнса кăмăлне çĕклет.
Мăшăрĕпе икĕ ывăл та пĕр хĕр пăхса ỹстернĕ. Хĕрĕ çемьеленнĕ. Шел, упăшки чире пула çамрăкла çĕре кĕнĕ. Йывăр самантсене тỹссе ирттерме тивнĕ ăна.
Зоя Михайловна тирпейлĕхе, илеме юратать. Пур çĕрте те тасалăх хуçаланать кил хуçалăхĕнче. Район хаçачĕпе те тахçантанпа туслă.
Р.ШУМОВА.
Источник: "Ял ĕçченĕ"