08 апреля 2016 г.
Енĕш Нăрвашри халăх театрне тĕрлĕ çĕрте ĕçлекенсем, тĕрлĕ ăрури çынсем çỹреççĕ. Вĕсем районти ялсене те тухса çỹреме тăрăшаççĕ.
Асăннă халăх театрĕ нумаях пулмасть Улянкăри культура çуртĕнче Николай Сидоров пьеси тăрăх "Кукша пуçа куршанкă çыпăçмасть" ятлă спектакль лартса савăнтарчĕ ял çыннисене.
Ĕç ялта, хальхи вăхăтра пулса иртет. Амăшĕ хĕрĕпе кĕрỹшне пĕрле пурăнтарасшăн мар, уйăрттарасшăн, пуянрах каччă тупса парасшăн.
Питĕ ĕненмелле вылярĕç артистсем хăйсен ролĕсене. Кашни артист спектакльти пурнăçа кĕрсе витĕмлĕн сăнласа пачĕ.
Спектакльте ытларах кулмалли самантсем пулчĕç. Курма килнĕ çынсем алă çупса хавхалантарсах тăчĕç енĕшнăрвашсене.
"Татах килĕр-ха эсир пирĕн пата. Манса ан кайăр пĕчĕк яла, чăн-чăн артистсенчен пĕрре те кая мар вылятăр," - терĕç курма килнĕ çынсем спектакль вĕçленсен, тăвăллăн алă çупса тав турĕç.
Л.ПЕТРОВА, Улянкăри культура çурчĕн администраторĕ.
Источник: "Ял ĕçченĕ"