04 декабря 2015 г.
Хаклă çынсене халалласа иртнĕ шăматкун Улянкă ялĕнчи культура çуртĕнче уяв пулчĕ.
Аннесене хисеплесе, юратса чĕререн тухакан юрăсемпе сăвăсем, ташăсем парнелерĕç шкул ачисемпе культура çурчĕ çумĕнчи фольклор ушкăнĕ. Кашни юрă-сăвă, ташă хыççăн чылайччен алă çупни илтĕнсе тăчĕ. Концерт хыççăн культура çурчĕ çумĕнчи фольклор ушкăнĕ Альбина Никитина (Сухан) çырнă "Виçĕ хĕрарăм - пĕр пасар" ятлă инсценировкине лартса пачĕ. Курма килнĕ çынсене килĕшрĕ постановка.
"Юрă-ташăра çеç мар, спектакльте те ăста выляççĕ-çке пирĕн хĕрарăмсем", - тесе тав сăмахĕсем каларĕç уяв вĕçĕнче маттур артистсем пирки.
Л.ПЕТРОВА, администратор.
Сăн ỹкерчĕкре: Любăпа Елена Петрушковасем.
Источник: "Ял ĕçченĕ"