20 ноября 2015 г.
Йăнтăрчă шкулне вĕренсе тухнисем хушшинче паллă та мухтава тивĕçлĕ çынсем чылай: учительсем, тухтăрсем, çар çыннисем, çĕр ĕçченĕсем, çыравçăсемпе драматургсем, инженерсемпе фабрика-завод ертỹçисем, культура ĕçченĕсем...
Тăвай енĕн хисеплĕ те сумлă çынни В.Н.Иванов - "Акконд" кондитер фабрикин гендиректорĕ. Валерий Николаевич Чăваш Республикин Аслă Канашĕн депутачĕ пулнă май Йăнтăрчă ял тăрăхĕшĕн те, шкулшăн та чылай пархатарлă ĕç тăвать. Спорт инвентарĕсем илмелле-и, юсав ĕçĕсем туса ирттермелле-и - Валерий Николаевич яланах пулăшма майсем тупать. Унсăр пуçне ачасене професси суйласа илес енĕпе те ырă канашсем парать. Кăçалхи апрель уйăхĕн вĕçĕнче эпир, 10-11 классенче вĕренекенсем, хамăрăн ентеш ертсе пыракан "Акконд" фабрикăра пултăмăр. Кунти ĕç процесĕпе паллашнă май, хăшĕсен малашлăхне кондитер профессийĕпе çыхăнтарас ĕмĕт те çуралчĕ пулĕ.
В.М.Яковлева - ЧГПУ ют чĕлхе кафедрин доценчĕ, С.И.Иванов - Тутар Республикин тава тивĕçлĕ врачĕ, травмотолог-ортопед, А.К.Клементьев _ паллă çыравçă, Р.П.Ахтимирова - педагогика наукисен кандидачĕ, Н.А.Ананьев - медицина наукисен кандидачĕ, Чăваш Республикин тава тивĕçлĕ врачĕ пулнă, Н.И.Сидоров драматург тата ыттисем... Малалла татах та пулĕç-ха вĕсем, тăван шкул ятне çỹле çĕклекенсем. Эпир вĕсемпе мăнаçланатпăр, мухтанатпăр, сума сăватпăр, вĕсенчен ырă тĕслĕх илетпĕр.
Эпĕ те кăçал юратнă шкулпа сыв пуллашатăп. Аслă шкула вĕренме кĕресшĕн. Право хуралĕнче ĕçлекенсен профессийĕ килĕшет мана. Хамăн пĕрремĕш вĕрентекене Людмила Петровна Егорована тăван анне вырăнĕнче пулса пире ырра вĕрентнĕшĕн чĕререн тав сăмахĕ калас килет.
Мария ГРИГОРЬЕВА, вĕренỹ отличникĕ, 11 класс.
Источник: "Ял ĕçченĕ"