Публикации » Тăрăшуллă хĕр ачапа вĕрентекен

Йăнтăрчăри вăтам шкулти хĕр ачасемпе арçын ачасем хушшинче спортра маттуррисем те, вĕренÿре малта пыракансем те, тĕрлĕ кружоксене çÿрекенсем те, ĕçлеме юратакансем те нумай. Çÿлерех асăннă пахалăх енĕсене вара пĕр уйрăм хĕр ача пултарулăхĕнче те курма пулать.

Чăнахах та питĕ тăрăшуллă хĕр ача вĕренет 7-мĕш класра: вăл – Диана Иванова. Хăйĕн ячĕ пекех хитре те илĕртÿллĕ, сăпайлă та маттур вăл. Спорта шутсăр юратать, эстафетăсене хутшăнать, хăвăрт утассипе хăйĕн ÿсĕмĕнче республика шайĕпе малти вырăнсене йышăнать. Ялти информаципе культура центрĕ çумĕнчи тĕрлĕ кружоксене çÿреме те вăхăт тупать: çыхма, тĕрлĕ хатĕртен япаласем ăсталама, ташлама юратать. Драма кружокне çÿресе, Диана хăйне тĕрлĕ рольте шырать: юптарусем аван калать, сăвăсем витĕмлĕ вулать, концерт программисене начар мар ертсе пырать.

Нумай пулмасть Диана районти кĕрхи выставка валли экспонат хатĕрлесе конкурсра 1-мĕш вырăн çĕнсе илнĕ. Вăл ялти библиотека çумĕнчи “Ал ĕçĕ” кружока çÿрет, вĕрентекенĕ – Алина Егоровна Владимирова. Диана хастарлăхĕпе тата сăпайлăхĕпе хăйне вĕрентекене хывнă тесен те йăнăш пулмĕ. Мĕншĕн тесен Алина Егоровна Йăнтăрчăри вăтам шкулта технологи предметне вĕрентнисĕр пуçне ялти библиотекарьте те тăрăшать. Кунти библиотека фондĕнче 10267 экземпляр кĕнекепе брошюра шутланать. Вĕсене пурне те стеллажсем çине йĕркелесе вырнаçтарнă. Кунта ирĕклĕ, ăшă, хăтлă, кăмăла каякан кĕнекесене çăмăллăнах тупма пулать. Вулăр, тишкерĕр, тĕнчекурăма аслăлатăр кăна. Чăваш кĕнекине, Чăваш енпе тăван ене халалланă кĕнеке выставкисем те пур. Библиотека çумĕнче ал ĕç ăстисен кружокĕ ĕçлет. Ăна, маларах асăнтăмăр ĕнтĕ, Алина Егоровна ертсе пырать. Унта шкул ачисем эрнере икĕ хут, çитĕннисем уйăхра икĕ хутчен пухăнаççĕ, тĕрлĕ япаласем çыхма вĕренеççĕ, пысăкăшĕпе тĕрлĕрен изделисем янтăлаççĕ, ăсталăха ÿстереççĕ. Хатĕр изделисемпе курса кăсăкланма та пулать: вырăнти ял тăрăхĕнче те, библиотека стенчĕсем çинче те пур вĕсем. Çамрăк ал ĕç ăстисен библиотекăри пĕр занятийĕнче хам та мăнукăмсемпе пĕрле пулса куртăм. Творчествăлла ĕç пыратчĕ кружокра, питĕ кăсăкланса та хавхаланса ĕçлетчĕç ачасем. Алина Владимирова вара вĕсемшĕн ертÿçĕ-маçтăр кăна мар, чун-чĕре ăшши те.

Çапла, Тенеялĕнче пурăнать, Йăнтăрчăра ĕçлет Алина Егоровна. Канмалли кунсенче вара Канаш хулинчи творчество çуртне васкать, унта та вăл ал ĕç кружокне йĕркелесе пырать.

 

Сăн ÿкерчĕксенче: А.Владимирова ал ĕç кружокĕн занятийĕнче; Диана Иванова.