13 ноября 2015 г.
Кирек мĕн е кам пекех, çĕр те хăйне пăхнине юратать. Вăхăтра пăхса-кăпкалатса тăрсан, пулăхлăхне ỹстерсен, çулленех лайăх тухăçпа савăнтарма хатĕр вăл.
Çавăнпа ку эрнере те çĕр кăпкалатас ĕçре тăрăшрĕ "Акконд-агро фирма" хупă акционерлă обществăри Михаил Егоров механизатор. Вăл унчченхи сысна самăртмалли комплекс çывăхĕнчи анана ку чухнехи хăватлă техникăпа кăпкалатса тухса, Вăтаяль остановки çывăхĕнчи пусса куçрĕ.
Çĕр ĕçĕн майĕсене Михаил Васильевич çамрăклах хăнăхма тытăннă. 1962 çулхи июлĕн 12-мĕшĕнче Улянкă ялĕнче çуралса ỹснĕскер, вăл Йăнтăрчăри сакăр çул, Тăвайри вăтам шкулсенчен вĕренсе тухнă, шкулта пĕлỹ пухнă чухнех тракторист тата шофер прависене илнĕ. Тăрăшнă çамрăк, вăтам пĕлỹпе пĕрлех ялта кирлĕ профессисене алла илме пултарнă. Унтан вырăнти "Заря" колхозра трактористра ĕçленĕ. Совет Çарĕнче службăра пулнă хыççăн тăван ялне таврăнать. Служба çулĕсенче çĕршĕн тунсăхлама та ĕлкĕрет вăл. Çавăнпа çартан таврăнсан тăван "Луч" колхоза вырнаçать, çанăсене тавăрса ĕçе пикенет, çитĕнỹ хыççăн çитĕнỹ тăвать, наградăсене тивĕçет.
1988 çулта Смоленск облаçĕнчи Духовщина районĕнчи "Салют" совхоза пулăшма каять. Хастар тракториста унта та Хисеп грамотипе чыслаççĕ, унăн сатурлăхне çапла майпа палăртаççĕ.
Хам та хаçат ĕçĕпе хуçалăхсене кайсан-тусан, Михаил Васильевичăн пултарулăхĕпе пĕрре кăна мар савăннă - тракторпа курнă-и эпĕ ăна уйра е тĕш тырă комбайнĕпе тырă çапса тĕшĕленине.
Ĕçри çитĕнỹсемшĕн Михаил Егоров 1984-1985 çулсенче ВДНХ бронза медалĕсене, ЧАССР Верховнăй Совечĕн Президиумĕн Хисеп грамотине, II степеньлĕ "ХI пилĕкçуллăхăн çамрăк гвардеецĕ" паллăна тивĕçнĕ. Унăн сăнне районти Хисеп хăми çинче те курма пулнă. Вăл 1998 çулхи ака чемпионĕ.
Хальхи вăхăтра Чăваш Республикин тава тивĕçлĕ механизаторĕ чылайранпа "Акконд-агро фирма" хупă акционерлă обществăра вăй хурать. Общество директорĕ Вячеслав Павлович Иванов хурламасть ăна. "Халĕ вăл КЭЙС-310 хăватлă трактортан глубокорыхлитель çаклатса тырă анине кăпкалатать", - терĕ.
И.ГЛАДКОВ.
Источник: "Ял ĕçченĕ"