13 ноября 2015 г.
Юбилейпе саламланă
Йăнтăрчă ялĕнче пурăнакан Раиса Захаровна Матвеева çак кунсенче 90 çул тултарчĕ.
Çав ятпа ăна вырăнти ял тăрăхĕн пуçлăхĕ Анатолий Семенов, унăн çумĕ Алевтина Уськина тата ялти ветерансен канашĕн председателĕ Раиса Кондратьева ăшшăн саламланă, вăрăм кун-çул, çирĕп сывлăх суннă, тутăр çыхтарнă. Раиса Захаровна пурне те тав тунă.
Паха шывшăн
Ялти культура çуртĕнче халăха колонка шывĕпе тивĕçтерес ыйтупа пуху иртрĕ.
Тенеяльсен опытне ырларĕç, шыва пăрăхсем тăрăх тỹрех насуспа уçламалла тăвас тесе йышăнчĕç. Çакăн валли халăхран укçа пуçтарма тытăннă. "Хĕле кĕриччен водопровод шывĕпе тивĕçтермелле туса ĕлкĕрсен питĕ лайăх пулнă пулĕччĕ", - теççĕ ял çыннисем.
Çара ăсатнă
Ялти икĕ каччăна культура çуртĕнче чысласа Раççей çарне службăна ăсатрăмăр. Вĕсенчен пĕри, Евгений, ялти хисеплĕ Альберт Геннадьевичпа Эмилия Фридриховна Федоровсен ывăлĕ.
Вăл службăна кайма ят тухиччен Шупашкарта университет вĕренсе пĕтерчĕ. Сăмах майăн каласан, унăн ашшĕ хăй вăхăтĕнче Афганистанра служба тивĕçĕсене пурнăçланă.
Алеша Владислав Николаевичпа Лариса Михайловна Егоровсен виççĕмĕш ывăлĕ. Йышлă çемьерен вăл, вĕсен пурĕ 6 ача. Алеша нефтянике вĕреннĕ.
Çара каякан каччăсене маттур та хастар пулма, службăна лайăх татса таврăнма ырă суннă юлташĕсемпе тăванĕсем, ял çыннисем. Эльза Николаева Йăнтăрчă ял тăрăхĕн ячĕпе вĕсене алшăллисем çакса янă.
Е.АНДРЕЕВА, культура ĕçченĕ.
Источник: "Ял ĕçченĕ"