06 ноября 2015 г.
Масар - сăваплă вырăн. Унта пирĕн несĕлсем канлĕх тупнă. Масара тирпей-илем кỹресси кашни çыннăн тивĕçĕ пулмалла.
Тенеяльсем те масара типтерлесе тăма тăрăшаççĕ. Çимĕк çитиччен ушкăнпа кайса тасатаççĕ. Халиччен ял масарĕнче йĕпе-сапаран, çил-тăманран кĕрсе хỹтĕленме хуралтă пулманччĕ. Кăçал, акă, кĕрхи ĕçсене пуçтарсан, ял халăхĕ нимене пуçтарăнчĕ. Фельдшерпа акушер пункчĕн кивĕ çуртне сỹтсе масар çывăхне кайса хунăччĕ. Арçынсем пура купаларĕç, хĕрарăмсем ĕçлекенсене хуранпа вĕри апат пĕçерсе çитерчĕç. Камăн нимене пыма май пулман, вĕсем юр-вар парса пулăшрĕç. Вăтăр çын таранах пуçтарăнчĕ пĕр кунхине. Каç тĕлне пура çĕкленсе те ларчĕ. Ытти кунсенче тăррине витрĕç, алкум та туса хучĕç маттур арçынсем. Ялти масар пỹртне тунă çĕрте никам та айккинче юлмарĕ. Александр Данилов, Виталий Васильев, Вячеслав Федоров, Виталий Анисимов, Виталий Егоров, Андрей Бадеряков, Валентин Арсентьев уйрăмах тăрăшуллă пулчĕç. Валентина Ильина, Светлана Гурьева, Светлана Григорьева, Надежда Анисимова, Нина Петрова, Роза Ермолаева тутлă апат-çимĕçпе сăйларĕç ĕçлекенсене. Алевтина Александровапа Александр Данилов пỹрт тăррине витме тимĕр парса пулăшрĕç. Пирĕн округран район депутатне суйланнă Елена Семеновна Емельянова та килсе ниме халăхне хавхалантарса хăварчĕ. Çапла халĕ Тенеялĕнче йĕпе-сапаран хỹтĕленмелли пỹрт пур. Куншăн ял халăхĕ кăмăллă.
Ю.ЕГОРОВА. Тенеялĕ.
Источник: "Ял ĕçченĕ"