23 октября 2015 г.
Улянкăри культура çуртĕнче ĕçлекенсем аслă ỹсĕмрисене те, çамрăксене те тĕрлĕ мероприятисене хутшăнтарма тăрăшаççĕ. Ватă çынсене хисеплесе уяв ирттернĕччĕ ку уйăх пуçламăшĕнче. Чылайăн пухăннăччĕ сумлă ветерансем. Шкул ачисемпе фольклор ушкăнĕн членĕсем концертпа савăнтарнă. Çавра сĕтел хушшине лартса курăк чейĕпе, тутлă кукăльсемпе хăналанă.
Иртнĕ шăматкун вара ялти çамрăксемпе "Кĕркуннехи хаваслă вăйăсем" ятлă мероприяти йĕркеленĕ. Мероприятие ытларах аслă классенче вĕренекенсем хутшăннă. Малтанах волейбол турнирĕ пулнă. Арçын ачасемпе хĕрачасен командисем тупăшнă. Темиçе тапхăр вылясан çивĕч кĕрешỹре арçын ачасем çĕнтернĕ. Вĕсене пĕчĕк парнесем парса хавхалантарнă. Волейбол турнирĕ хыççăн тĕрлĕ хаваслă вăйăсен çĕнтерỹçисене те призсемпе савăнтарнă. Кĕрхи уяв дискотекăпа вĕçленнĕ.
Л.ПЕТРОВА, клуб администраторĕ
Источник: "Ял ĕçченĕ"