05 июня 2015 г.
Йăлана кĕнĕ йĕркепе тенеяльсем майăн 31-мĕшĕнче ял çумĕнчи вăрман уçланкинче Тройски праçникĕ ирттерчĕç. Ăмăртусемпе юрă-ташăран тата суту-илỹрен татăк пулмарĕ уяв. Аслă ỹсĕмри хĕрарăмсемпе арçынсем, ватăсем 100 метрлă дистанцие тупăшса чупрĕç. Çамрăксем волейбол вылярĕç. Пĕчĕкрех ачасем канат туртрĕç. Кантраран çыхса янă призсене куçа хупса каса-каса илни те интереслĕ пулчĕ. Вăйăсене хастар хутшăннисене пĕчĕк призсем парса та хавхалантарнă. Укçине "Новый путь" ЯХПК уйăрнă.
Чи кăсăкли Моисей Петрович Петров хăй купăсне тăсса ярса çынсене юрлаттарма тата ташлаттарма тытăнсан пуçланчĕ. Пурте купăсçă тавра пухăнчĕç. Юрă-ташă кĕвви-çемми таврана саланчĕ. Хăй тĕллĕн вĕреннĕ купăсçă вăл, анчах епле маттур. Хăй вăхăтĕнче колхозра механикре те, ытти ĕçсенче те тăрăшнă вăл. Арăмĕ, Нина Павловна, çынсене килте тунă сăрапа сăйларĕ. Мана пулăшакансем, активисткăсем, шỹрпе те пĕçернĕ. Кашниех юратса çирĕ ăна. Уйрăмах хуласенчен килнисем питĕ кăмăлларĕç. Праçникре ютран килнисем те пулчĕç. Пурне те питĕ килĕшрĕ.
Р.ЕРМОЛАЕВА, ялти клуб администраторĕ.
Источник: "Ял ĕçченĕ"