06 мая 2015 г.
Йăнтăрчăри вăтам шкулта вĕрентекенсемпе ачасем хамăр ентеш В.Н.Иванов ертсе пыракан "Акконд" фабрикăра пулса курчĕç. Пире питĕ тарават та ăшшăн кĕтсе илчĕç. Шел пулин те, Валерий Николаевичăн васкавлă ĕçпе каймалла пулчĕ. Производство пуçлăхĕ И.П.Мочалова цехсем тăрăх кăтартса çỹресе экскурси йĕркелерĕ.
Чи малтанах Ирина Петровна "Акконд" фабрика аталанăвĕн çул-йĕрĕ çинче чарăнса тăчĕ. Фабрикăра çуллен çĕнĕрен те çĕнĕ цехсем уçăлни, пылак çимĕçĕн ассортименчĕ ỹссе пыни пирки каларĕ. Эпир çиекен пылак канфет-печени сĕтел çине çитиччен миçе алă витĕр тухнине, вĕсене еплерех хатĕрленине, цехсенчи машинăсем мĕнлерех ĕçленине, туса кăларакан продукци Раççейри тĕрлĕ хуласемпе чикĕ леш енне ăсанни, ятарлă заказсемпе ĕçлени çинчен тĕплĕн каласа кăтартрĕ. Ачасемшĕн пурте кăсăклă пулчĕ: кунта ĕçлекенсен шалăвĕ, пĕр сменăра мĕн чухлĕ продукци туса кăларни, ытларах мĕнле специальноçпа ĕçе илни, технологпа кондитер профессине ăçта вĕрентни...
Кун пек тĕл пулусем çамрăксемшĕн усăллă та пĕлтерĕшлĕ. Тен, хăйсен малашлăхне çак фабрикăпа çыхăнтаракан, хамăр ентешĕн ĕçне малалла тăсакансем те тупăнĕç. Экскурсире пулнисем хушшинче кун пирки шутлакансем те пулчĕç.
"Акконд" ĕçченĕсем йăнтăрчăсене сиплĕ чейпе, пылак çимĕçпе сăйларĕç, çул çине кучченеçсем парса ячĕç. Ачасем те парăмра юлмарĕç. Хăйсен аллипе ăсталанă пĕчĕк парне пачĕç асăнмалăх.
Г.ВАСИЛЬЕВА.
Источник: "Ял ĕçченĕ"