06 марта 2015 г.
Тăван çĕршывăн Аслă вăрçинче çĕнтерÿ тунăранпа кĕçех 70 çул çитет. Пирĕн халăхшăн çав тери хаклă та сумлă çак юбилее халалласа Йăнтăрчă ял тăрăхĕнчи культура çурчĕсемпе библиотекăсенче тĕрлĕрен мероприятисем иртеççĕ.
Акă çак кунсенче «Тенеяль» фольклор ушкăнĕ халăха концерт лартса пачĕ. Концертра вăрçă çулĕсенчи юрăсем янăрарĕç. Фольклор ушкăнĕ «Вăрçă вăхăтĕнче улах ларни» сценарипе те паллаштарчĕ.Хĕллехи вăрăм каçсенче фронта валли ăшă çи-пуç хатĕрленине сăнарлăн кăтартса пачĕç вырăнти артистсем. Ушкăнра ытларахăшĕ тивĕçлĕ канăва тухнă хĕрарăмсем. Çапах та обществопа культура пурнăçне вĕсем яланах хастар хутшăнаççĕ, çавăншăн тав вĕсене пурне те.
Аслă Çĕнтерĕве халалласа Тенеялĕнчи библиотекăра «Асран тухми çулсем», Йăнтăрчăра «Память вечна как – Вечный огонь» кĕнекесен куравне йĕркеленĕ. Куравсенче фронтран ялти тăванĕсем патне çырнă виç кĕтеслĕ салтак çырăвĕсемпе те паллашма пулать.
Р.Ермолаева, Ю.Егорова.
Источник: "Ял ĕçченĕ"