13 марта 2015 г.
Уяв кунĕнче çанталăк пĕтĕм хăйĕн ырлăхне парнелерĕ хĕрсене. Ирех сар хĕвел хăй çутине сапаларĕ, çынсене урама йыхравларĕ.
Улянкă ялĕнче сывă пурнăç йĕркине кăмăллакансем çак кун йĕлтĕр çине тăчĕç. Пĕчĕккинчен пуçласа аслă ăрурисем таранах хутшăнчĕç ăмăртăва. Т.Иванов депутат пурне те уяв ячĕпе саламларĕ, спортпа туслă, хастар пулма çирĕп сывлăх, мала тухма ăнăçу сунчĕ. Тĕрлĕ ỹсĕмрисем хушшинче А.Нилова, Д.Иванов, В.Кузьмин, А.Михайлова, С.Кириллова çĕнтерчĕç. Пурне те грамотăсемпе, пылак çимĕçпе хавхалантарчĕç. Пухăннисем ăмăртăва йĕркеленĕ, спонсорла пулăшу панă Т. Иванова тав турĕç.
Малалла уяв ялти клубра тăсăлчĕ. Халăх туллиех пухăннă. Шкул ачисем хаваслă концерт кăтартрĕç. Хĕрарăмсем хушшинче тĕрлĕ конкурс иртрĕ. Кил ăшшине упракансем ăста кил хуçи, лайăх мăшăр, кăмăллă анне пулнине ĕнентерчĕç. О.Михайлова "Чи хастар анне", Т.Митрофанова "Кăмăллă анне", М.Владимирова "Пултаруллă анне", А.Иванова "Ăслă анне", Н.Петрушкова "Савăнăçлă анне" ятсене тивĕçрĕç.
Уявăн тепĕр пайĕнче Тăван çĕршывăн Аслă вăрçин ветеранĕсемпе тыл ĕçченĕсене юбилей медалĕсемпе чысларĕç. Йăнтăрчă ял тăрăхĕн пуçлăхĕн çумĕ А.Уськина, Т.Иванов депутат сумлă наградăна тивĕçнисене саламласа çирĕп сывлăх, вăрăм кун-çул, канлĕ ватлăх сунчĕç. Улянкă клубĕ çумĕнчи фольклор ушкăнĕ хаваслă юрă-кĕвĕ парнелерĕ.
Л.ПЕТРОВА, клуб администраторĕ.
Источник: "Ял ĕçченĕ"