28 октября 2014 г.
Ял ĕçченĕ" хаçата кашни ытлари кунпа эрне кунах тỹсĕмсĕррĕн кĕтетпĕр, ăна упăшкапа иксĕмĕр те юратса вулатпăр. Район хаçачĕ пулнăран-и, киле районтан хăна пырса кĕнĕнех туятпăр ăна алла тытсан. Çавăнпа ăна кашни эрнерех икĕ хутчен пире, вулакансене, валли хатĕрлесе кăларакан журналистсене, хаçатçăсене чĕререн тав сăмахĕ калас килет. Хаçата алла илсен, унти тĕрлĕ хыпарсемпе паллашатăн. Пурнăçри пур темăна та хускатма тăрăшать хаçат. Районтине çеç мар, республикăри тата унăн тулашĕнчи информацисемпе те паллашма пулать "Ял ĕçченне" вуласан. Пĕркунтарах акă районти ял хуçалăх ĕçĕнче малта пыракансем хăйсен праçникне епле уявланине те çырса кăтартрĕ хаçат. Унта пирĕн хуçалăхри Альбина Иванова дояркăпа Лидия Иванова ветеринар сăн ỹкерчĕкĕсене те кĕртнĕ. Вĕсемшĕн савăнтăмăр, чăннипех те маттур ĕçченсем вĕсем, хăйсен ĕçне чун-чĕререн парăннă çынсем. Альбина Сергеевна "Чăваш Республикин ял хуçалăхĕн тава тивĕçлĕ ĕçченĕ" хисеплĕ ята та тивĕçнĕ. Халĕ те уявра район администрацийĕн Хисеп грамотипе чысланă ăна. Лидия Федоровна та питĕ пултаруллă, хăйĕн ĕçне лайăх пĕлекен специалист. Иккĕшĕ те ял-йыш хисепне тахçанах тивĕçнĕ ĕçченсем вĕсем.
Хаçат пулăшнипе районти "Акконд-агро фирма" обществăн, ытти хуçалăхсен ĕçĕ-хĕлĕпе те, республикăра тата районта пулса иртекен мероприятисемпе те, тухтăрсен, ытти специалистсен канашĕсемпе те, пурнăçра пулни-иртнипе те паллашсах тăратпăр. Ỹлĕмрен те пурнăçран юлса ан пырăр. Çитменлĕхсене те уçса парăр. "Ял ĕçченĕ" хаçата çитес çул илсе тăма ытти çынсем те пирĕн пекех вăхăтра çырăнĕç тесе шанса тăратпăр.
Н.АНИСИМОВА. Тенеялĕ.
Источник: "Ял ĕçченĕ"