Публикации » Ачалăхăм, ачалăх

03 июня 2014 г.

Тенеялĕнчи клубра та ялти ачасемпе, çамрăк амăшĕсемпе кашни çулах савăнăçлă уяв йĕркелесси йăлана кĕнĕ. Иртнĕ вырсарни кун та клуб умĕнчи площадкăна пуçтарăнса «Ачалăхăм, ачалăх» кану кунĕ ирттертĕмĕр. Уява хатĕрленсе Ю.Н.Егорова библиотекарь уçă  сывлăшра «Я – ребенок, я – человек!» ятлă кнекесен куравĕ  йĕркелерĕ. Малтанах вăл кураври кĕнекесемпе паллаштарчĕ. Малалла ялти клуб ертçи Р.А.Ермолаева «Хаваслă стартсем» конкурс йĕркелесе савăнтарчĕ. Ачасем икĕ ушкăна пайланса тĕрлĕ хаваслă конкурссенче хутшăнчĕ. Унтан чăваш халăхĕн ĕлĕкхи вăййисене аса илсе вылярăмăр. Ачасене ытларах кушакпа шăшилле выляни килĕшрĕ. Ку вăййа шкул çулне çитмен ачасем те юратрĕç.  Уявпа пурте кăмăллă юлчĕç, малашне те пĕрле пуçтарăнса кану вăхăтне усăллă та хаваслă ирттерес тесе калаçса татăлтăмăр.

Р.Ермолаева,

клуб администраторĕ

Источник: "Ял ĕçченĕ"