09 августа 2013 г.
_Preview.jpg "Саламласа тав тунă")
Тенеялĕнче пурăнакан Ольга Ивановна Алексеева 90 çул тултарчĕ. Çав ятпа тыл ĕçченне РФ Президенчĕ Владимир Путин тав тунă. Президент тав туса çырнине юбиляр патне район администрацийĕн пуçлăхĕ Владимир Ванерке, Йăнтăрчă ял тăрăхĕн пуçлăхĕ Ирина Хайдукова, Раççейри Пенсионерсен Союзĕн республикăри уйрăмĕн правленийĕн председателĕ Валерий Сапожников тата райадминистрацин социаллă хÿтлĕх пайĕн начальникĕ Людмила Аввакумова илсе çитернĕ, вĕсем ветерана юбилей ячĕпе чĕререн саламланă, ырлăх-сывлăх, телей, савăк кунсем сунса чечек çыххи панă, йывăрлăхсене парăнмасăр çĕр-шыв тĕрекĕшĕн вăй-хала шеллемесĕр ĕçленĕшĕн тав тунă.
Ольга Ивановнана хăй ĕмĕрĕнче таçта та вăй хума тивнĕ. Вăрçă çулĕсенче вăл хĕр пуççăн вăрман каснă, ăна турттарнă, тырă вырнă, вăрах вăхăт колхозăн пахча çимĕç бригадинче тăрăшнă. Çулĕсене пăхмасăр халĕ те алăсене усса лармасть, мăнукĕсемпе вĕсен ачисене пăхать. Валерий Васильевич Сапожников юбиляра сума суса “Аннене анне тееççĕ” юрăпа саламланă.
И.ФЕДОРОВ.
Сăн ÿкерчĕкре: О.И.Алексеева.
Источник: "Ял ĕçченĕ"