06 сентября 2011 г.
Çак кунсенче иккĕмĕш тĕнче вăрçи вĕçленнĕренпе 66 çул тултарчĕ. Халăхсен историйĕнчи чи хаяр вăрçа, мĕльюншар çын пурнăçне татнăскере, Улянкăра çуралса ÿснĕ Григорий Иванович Иванов та хутшăннă.
–Çар службине мана, 17 çулхи çамрăка, 1944 çулхи октябрьте илчĕç. Пирĕн çарсем тăшмана анăçалла хăваласа каятчĕç. Пире вара, çар ретне çĕнĕрен тăнисене, Инçет Хĕвел тухăçне илсе кайрĕç. Эпĕ зенитчиксен чаçне лекрĕм, вĕреннĕ хыççăн наводчик пулса тăтăм, – каласа парать 84 çулхи ĕçпе вăрçă ветеранĕ Григорий Иванов.
Японецсем пирĕн çарсем хăвăрт тапăнса кĕнине тусеймен, çухалса кайнă. Пирĕн зениткăсем вĕсен самолечĕсене вĕçме, карапĕсене тинĕсе тухма паман, торпедăсемпе атакăланă.
Япони парăннă хыççăн вĕсен чаçне караппа Çурçĕр Корейăна илсе каяççĕ. Анчах карап бухтăна çитсе ĕлкĕреймест, мина çине лексе сиенленет, салтаксене каçхине шхунăпа çыран хĕрне антараççĕ. Совет салтакĕсем кореецсене тăшмана çĕнтерме пулăшаççĕ, артиллерипе, авиаципе тивĕçтерсе тăраççĕ. Г.Иванов флота лекет, прожектористсен чаçĕнче тăрать. Пултаруллă салтака офицерсен шкулне вĕренме яраççĕ. Икĕ çултан вăл кĕçĕн лейтенант ятне илет, финанспа тивĕçтерес енĕпе тăрăшать.
1952 çулта тăван ялне курма килсен, Григорий Иванович авланать, мăшăрне те, Елизавета Петровнăна, хăйпе пĕрле служба вырăнне илсе каять. 1954 çулчченех службăра тăрать Григорий Иванов, çар ĕçне шăп та лăп 10 çул парать. Çемьери лару-тăрăва пула (амăшĕ пĕччен тăрса юлнă, ашшĕ 1941 çулхи октябрьте Ярославль патĕнче çĕре кĕнĕ) тăван тăрăха куçса килет. Райĕçтăвкомра кадрсен секторĕн заведующийĕнче, Госстрах инспекцийĕн аслă инспекторĕнче, ДОСААФ райкомĕн председателĕнче, КБОра инженер-технорукра, “Сельхозтехника” пĕрлешĕвĕнче инженер-нормировщикре ĕçлет. 18 çул Патшалăх пушар надзорĕн Тăвайри инспекцине ертсе пырать. Кирек мĕнле ĕçре те Григорий Иванов хăйне шанса панă ĕçе яваплăхпа пурнăçласа пыма тăрăшнă. Унăн кăкăрне Отечествăлла вăрçă орденĕ, “Çапăçури паллă ĕçсемшĕн”, “Японие çĕнтернĕшĕн”, “В.И.Ленин çуралнăранпа 100 çул. Ĕçри хастарлăхшăн” юбилей медалĕ, “Ĕç ветеранĕ” медалĕсем илем кÿреççĕ. Мăшăрĕпе вĕсем пĕр ывăл пăхса çитĕнтернĕ. Шалти ĕçсен службин отставкăри подполковникĕ Григорий Иванов ывăлĕн çемйипе пĕрле пурăнать. Районти ятлă-сумлă çын вăл.
Источник: "Ял ĕçченĕ"