00:00 02 августа 2011 г.
Йăнтăрчă ял тăрăхĕнче тăватă ял, çак шута Тенеял кутри те кĕрет, вырăсла эпир ăна «выселок Октябрь» тетпĕр. Вăл илемлĕ вырăнта Кĕтне хĕрринче вырнаçнă. Ялĕ вара чăнахах та пĕчĕккĕ, пĕр урамран çеç тăрать, пурĕ çирĕм кил вырăнĕ кунта. Çыннисем хăтлă пурăнаççĕ: капмар пÿртсем, хуралтăсем ăсталаççĕ. Ялĕ пĕчĕккине пăхмасăр кунта çут çанталăк газне илсе çитернĕ, асфальтлă çул пур, электричество линийĕ аван ĕçлет, тĕттĕм вăхăтра урамра та çутă пур. Тата тепĕр ырлăх – кашни киле шыв çиттĕр – тесе тимлет ял администрацийĕ кунта пурăнакан сумлă çынсемпе пĕрле.
Каласа хăвармалла: ял пуçланса каячченех кунта сăрт çамкинчен аяларах вăйлă çăл пулнă, паян кунчченех çакăнти шывпа усă кураççĕ кутăр çыннисем. Паянхи куна вара: çăл патне пыракан çула, шыв юхса тухакан таканана, çăл тарасине тирпейлес ĕçсем пыраççĕ.