Тăрмăшри культура çуртĕнче уяв концерчĕ пулчĕ

Январь уйăхĕн 5 – мĕш числинче Тăрмăшри культура çуртĕнче Типшĕм Сашукăн (Александр Егоров) уяв концерчĕ пулчĕ. 10 çул хушшинче вăл Тăрмăшсене тĕрлĕрен юрăçсемпе паллаштарчĕ. Уйрăмах çамрăк юрăçсене сцена çине тухма пулăшни питĕ паха. Женя Тодиновпа Дима Моисеев купăспа хитре каласа куракансене те юрлаттарчĕç, ташлаттарчĕç. Аня Сарпике вара кашни юрринех хитре тумсем тăхăнса тухса хăйĕн çепĕç сассипе куракансен кăмăлне тыткăнларĕ. Концерт программи анлă пулчĕ, Типшĕм Сашукăн çĕнĕ юррисемпе пĕрле малтанхи юрăсем те янăрарĕç. Юбилей, çуралнă кунĕсен ячĕсемпе саламласа юрă хыççăн юрă парнелерĕç маттур юрăçсем. Куракансем те концертпа кăмăллă юлчĕç, кашни юрăна хыттăн алă çупса хавхалантарчĕç. Эстрада çăлтăрĕсем концертсемпе килсе хăйсен пултаруллăхĕпе паллаштарни ял халăхĕшĕн çав тери аван, Çĕнĕ çулта çĕнĕ вăй-хăват парать.

Концерт хыççăн куракансем дискотекăра ташласа савăнчĕç.