Публикации » Воспитательсем ăмăртнă

Мартăн 31-мĕшĕнче Вĕрентекен çулталăкне халалласа "Пилеш" ача садĕнче шкул çулне çитменнисемпе ĕçлекен воспитательсем хушшинче "Воспитатель-новатор – 2010" ятпа районти конкурс иртнĕ. Конкурса пурĕ районти çичĕ воспитатель хутшăннине палăртмалла. Вĕсен "Шанăç", "Эпĕ тата манăн çитĕнÿсем", "Манăн педагогика концепцийĕ" конкурссенче тупăшма тивнĕ.

Жюри членĕсене çĕнĕлле тимлекен чăн-чăн тата вăйлă воспитателе палăртма çăмăлах пулман. Пурте конкурса тĕплĕн те яваплăн хатĕрленнĕ. Воспитатель ĕçĕ хăйне евĕрлĕ-çке: вăл кашни пепкепе пахчаçă чечеке унăн уйрăмлăхĕсене шута илсе пăхнă пек ĕçлет, тăтăшах хăйĕн пĕлĕвне анлăлатать, педагогика çĕнĕлĕхĕсене ĕçе кĕртет...

Çапла вара, жюри кăтартăвĕсем тăрăх, "Пилеш" ача садĕнче вăй хуракан Людмила Максимова конкурс çĕнтерÿçи ята тивĕçнĕ. Çак ача садĕнчех ĕçлекен Ирина Абакумова тата "Хĕвел" ача садĕнче тăрăшакан Алена Сарина призерсем пулса тăнă. Конкурса хутшăнса активлăх кăтартнă Галина Хораськина (Хăмарккари пуçламăш шкул-ача сачĕ), Наталья Титилкина (Мишеркасси шкулĕ), Светлана Храмова тата Надежда Ладайкина ("Пилеш" ача сачĕ) та РФ халăх вĕрентĕвĕпе ăслăлăх ĕçченĕсен профсоюзĕн районти организацийĕн парнисене тивĕçнĕ.