11 июня 2015 г.
Çул çитмен çамрăксене Ĕçпе тивĕçтерекен центр урлă вăхăтлăх ĕçе вырнаçтараççĕ. Ытларах ĕçсĕр граждансен, тулли мар, нумай ачаллă, йывăр лару-тăрури çемьесенчи, ятарлă комиссисенче учетра тăракан ачасене ĕçпе тивĕçтерме тăрăшаççĕ.
2015 çулта районти Ĕçпе тивĕçтерекен центр çул çитмен 37 çамрăка вăхăтлăх ĕçе вырнаçтарма палăртать. Çакна валли республика бюджетĕнчен 270 пин тенкĕ уйăрнă, район бюджетĕнчен - 50 пин тенкĕ. Вăхăтлăх ĕçе вырнаçнисене 1275 тенке яхăн укçан пулăшу параççĕ тата ĕç саккунĕсемпе килĕшỹллĕн шалу тỹлеççĕ.
Паянхи куна ачасене ĕçе вырнаçтарас тĕллевпе вакансисен виçĕ ярмăрккине ирттернĕ. Унта районти вăтам шкулсем, ялхуçалăх предприятийĕсем тата ытти организацисемпе предприятисем хутшăннă.
Вăхăтлăх ĕçе вырнаçнă ачасем шкул е ял тăрăхĕн территорийĕсене тирпей-илем кỹреççĕ, ĕç тата вăрçă ветеранĕсене пулăшаççĕ, эмел курăкĕ пуçтараççĕ, шкулти е ялхуçалăхĕнчи сĕтел-пукан таврашне юсаса çĕнетме пулăшаççĕ.
Ачасене вăхăтлăх ĕçе вырнаçтарни вĕсене малашлăхра професси суйласа илме, ĕç рынокĕнче хăйсен вырăнне тупма, вĕсен пушă вăхăтне тĕрĕс йĕркелеме пулăшать. Унсăр пуçне ача хăйне тыткаламалăх укçа та ĕçлесе илеет.
Источник: "Наша жизнь" (Красночетайская районная газета)