30 декабря 2013 г.
Декабрь уйăхĕнче Чăваш Ен Пуçлăхĕ Михаил Игнатьев Мускавра Раççей Ют çĕр-шыв ĕçĕсен министерстви çумĕнчи РФ субъекчĕсен пуçлăхĕсен Канашĕн XXII ларăвне хутшăннă. 2013-2014 çулсенчи тапхăрта вăл унăн членĕ шутланать.
Ларура Раççейпе Евроканаш хушшинчи çыхăнусене, вĕсен малашнехи аталанăвĕн ыйтăвĕсене пăхса тухнă. Раççей ют çĕр-шыв ĕçĕсен министрĕ Сергей Лавров Раççей регионĕсем тата Ют çĕр-шыв ĕçĕсен министерстви информаци уçлăхĕнче пĕрле ĕçлесси лайăхланнине палăртнă, федераци субъекчĕсене инновацие мала кăларса чикĕ леш енчи çыхăнусене çине тăрсах аталантарма сĕннĕ.
Доклад тăвакансем хăйсен сăмахĕнче чикĕ леш енчи инвесторсемпе хутшăнусем йĕркеленĕ чухне регионсенчи суту-илÿпе промышленность палатисен майĕсемпе анлăрах усă курмаллине, хамăр çĕр-шыври аслă шкулсенче ют çĕр-шывсенчи туристсен йышне ÿстермеллине, пĕрлехи проектсене пурнăçланă чухне экологи нормисене пăхăнмаллине палăртнă.
Раççей Ют çĕр-шыв ĕçĕсен министерствинче çавăн пекех Михаил Игнатьев Федерацин Никама Пăхăнман Патшалăхсен Пĕрлĕхĕн, Пĕтĕм тĕнчери гуманитари çыхăнăвĕ енĕпе ĕçлекен агентство ертÿçипе Константин Косачевпа тĕл пулнă, республикăра çуралса ÿснĕ, халĕ чикĕ леш енче пурăнакан çынсене Чăваш Енре инвестици ĕç-хĕлне явăçтарас тĕлĕшпе çыхăну тытассине сÿтсе явнă.