23 ноября 2013 г.
Пĕчĕк тата вăтам предпринимательлĕхе аталантарни экономикăпа çыхăннă чылай ыйтăва татса пама пулăшать, вăл шутра ĕçсĕрлĕхе чакарма, суту-илÿ ĕçне анлăлатма тата пулăшусемпе тивĕçтерес, налуксем хывас тĕлĕшре пысăк вырăн йышăнать.
Октябрĕн 1-мĕшĕ тĕлне районта пĕчĕк тата вăтам предпринимательлĕхĕн 348 субъекчĕ ĕçленĕ, вăл шутра 43 пĕчĕк предприяти, тăхăр хресченпе фермер хуçалăхĕ, 296 уйрăм предприниматель (пĕлтĕрхипе танлаштарсан 40 предприниматель чакнă).
Пĕчĕк тата вăтам бизнесра 858 çын вăй хурать. Çак сферăра туса илнĕ таварпа ĕçсен, пулăшусен калăпăшĕ 32,7 миллион тенкĕпе танлашнă.
Пĕчĕк предприятисен тытăмĕн 51 проценчĕ суту-илÿпе, 30 проценчĕ ял хуçалăхĕпе, 14 проценчĕ промышленноçпа, пилĕк проценчĕ пулăшу сферипе çыхăннă.
Район администрацийĕн экономика, çĕр тата пурлăх хутшăнăвĕсен пайĕ предпринимательсене консультаци пулăшăвĕ парсах тăрать. Кăçал ЧР Экономика аталанăвĕпе промышленность тата суту-илÿ министерствин "Республикăри халăха ĕçпе тивĕçтерес енĕпе тата предпринимательсене пулăшакан бизнес-инкубатор" хăй тытăмлă учрежденийĕ халăх пултарулăх промыслисен ăстисем, уйрăм предпринимательсем хушшинче тÿлевсĕр вĕренÿ йĕркеленĕ. Унта Александр Туйманов вĕренсе килнĕ. Ăна тата районти тепĕр предпринимателе бизнес-инкубатор предпринимательство ĕçне йĕркелесе яма тÿлевсĕр план хатĕрлесе панă. Сĕнтĕкçырминче пурăнакан Александр Иванович Туйманов "Укçа евĕр сувенир продукцине туса кăларасси" бизнес-проектпа харпăр хăй ĕçне пуçарса яракансен конкурсĕнче çĕнтернĕ, 300 пин тенкĕне тивĕçнĕ.
Район администрацийĕн 2013 çулхи январĕн 11-мĕшĕнче тухнă йышăнăвĕпе килĕшÿллĕн харпăр хăй ĕçне пуçаракансем хушшинче грант çĕнсе илессишĕн конкурс йĕркеленĕ пулнă. Конкурс комиссине икĕ çын заявка тăратнă. Бизнес-плансене тишкернĕ хыççăн комисси федераллă тата республика бюджечĕсенчен район бюджетне куçнă тата харпăр хăй ĕçне йĕркелекенсене пама пăхнă укçа-тенкĕне пайланă. Çапла вара республика тата вырăнти бюджетсенчен Р.Н.Лисаев уйрăм предприниматель 40 пин тенкĕ, А.И.Туйманов 45 пин тенкĕ грант илнĕ.
А.ДМИТРИЕВА.
Источник: "Пирěн пурнăç"