23 августа 2013 г.
Пирус туртнăшăн ĕçрен кăларма пултараççĕ, анчах штраф тÿлеттерме никамăн та ирĕк çук.
Ĕçе юлса çитнĕшĕн е ытти кăлтăксемшĕн ертÿçĕсен штрафлама юрамасть. Анчах саккунпа килĕшÿллĕн, ĕç вăхăтĕнче пирус туртнăшăн ĕçсĕр тăрса юлма пулать. Ĕçпе тивĕçтерекен организацин шалти йĕрке правилисене çĕнĕлĕхсем кĕртме ирĕк пур. Унпа килĕшÿллĕн вара ертÿçĕ саккуна пăхăнман граждансене ĕçрен хăтарма пултарать.
Июль уйăхĕнче табака хирĕç саккун вăя кĕнĕ май, ĕç вырăнĕсенче тата шалти пÿлĕмсенче пирус туртма юрамасть. Тĕслĕхрен, больницăсенче, шкулсенче тата вĕсен çывăхĕнче.
Тĕрĕссипе, пурлăх хуçи пирус туртакан коллектива хирĕç мар пулсан унăн ятарлă пÿлĕм уçса табак сĕрĕмне пĕтерекен вăйлă, хăватлă хатĕр лартса парас пулать. Кун пек тума саккун чармасть. Вентиляци кăна лайăх ĕçлетĕр. Çавăн пекех туртмалли пÿлĕмсенче гигиена нормисен пуххине пăхăнмалла, табак сĕрĕмĕ сывлăшра палăртнă виçерен иртме кирлĕ мар.
Уйрăм предпринимательсен тата юридици сăпачĕсен территорире тата пÿлĕмре пирус туртассине чарма ирĕк пур. Ертÿçĕ кăмăлĕнчен чылай килет.