Публикации » Вырма пуçланчĕ

«Нива» ял хуçалăх производство кооперативĕн ĕçченĕсем районти ытти хуçалăхсенчен чи малтан, июлĕн 28-мĕшĕнче, вырма ĕçне пуçăнчĕç.

Тралькассисем вырмана Турхан ялĕ çывăхĕнчи уйри тулă пуссинчен пуçларĕç. Вырмана 3 комбайн:

«Енисей», СК-5 «Нива» тата «Полесье» тухрĕç. Хир карапĕсене уя илсе тухакансем çаксем: В.Апалеев, В.Васильев, Г.Михеев, Г.Апалеев, Ю.Воронов комбайнерсем. Çĕнĕ тырра йĕтем çине В.Казаков, С.Жижайкин, Н.Ивантаев водительсем автомашинăсемпе турттарса тăраççĕ.

Кăçал йĕтем çинчи ĕçсене йĕркелесе пыма Л.Матвеева шаннă. А.Ермеев, М.Воронцов, В.Галкин, В.Ильин, А.Гурьянов хăйсене шанса панă агрегатсене юсавлă ĕçлеттерме тăрăшаççĕ.

Тулă йĕтем çине таса та типĕ килет. Кăçал вĕсен тĕш-тырра 918 гектар çинче вырса илмелле.

Вырмана тухăçлă та кĕске вăхăтра вĕçлеме «Нива» хуçалăх ĕçченĕсене ÿсĕм те ăнăçу сунатпăр.