Чăваш Ен халăх йышлăлăхĕпе /республикăра ĕç вăйĕ ытлашши/ Раççей Федерацийĕн регионĕсен хушшинче малтанхи вунă теçеткере. Çакнашкал лару-тăру ĕç вăйне кирлĕ пек пайлама тата ресурссене территори тăрăх хăвăрт та çăмăл куçарассине аталантармашкăн унччен те ятарлă мерăсем йышăнмалла пулнă, халĕ те çапла тума тивет.
Чăваш Енĕн халăха ĕçпе тивĕçтерекен патшалăх служби Раççейĕн ытти субъекчĕсенчи лару-тăва тĕпчес, ĕçсĕр граждансене республика тулашĕнче вырнаçтармашкăн килĕшÿсем çирĕплетес тĕллевпе кампанисем ирттерет. Вĕсене палăртнă чухне, тĕпрен илсен, шалу пысăкрах тата производство условийĕсем лайăхрах йĕркеленнĕ регионсен представителĕсемпе калаçса татăлма тăрăшаççĕ.
Хальхи вăхăтра ентешсене республика тулашĕнче вырнаçтармалли масштаба уçăмлатма кансĕр, мĕншĕн тесен унашкал статистика çук. Шупашкарта кăна уйрăм çыннăн шутланакан 20 ытла фирма ĕçсĕрсене вырнаçтарассипе /çав шутра ытти регионта та/ пулăшу сĕнет. Рынок хутшăнăвĕсенчен иртеймĕн: ыйтакан пур тăк сĕнекен те тупăнать.
Иккĕленÿллĕ коммерци фирмисене шанса Раççей регионĕсенче ĕçлĕ пулас ĕмĕтпе çула тухакансене çакна аса илтересшĕн: вĕсем “çурăк валашка” умне тăрса юлма пултараççĕ, кун пек чухне никама та явап тыттараймăн. Ултавран еплерех асăрханма тата чее çынсен серепинчен хăтăлма май паракан хатĕр рецепт пирĕн, паллах, çук. Çапах та мĕнлерех кадр агентстви пулăшу сĕннипе тата условийĕсемпе тĕплĕнрех интересленмелле. Енчен те вырăн шыракансене вăл тÿлевсĕр хÿтĕлет тĕк, паллах, шанма пулать. Сăмах май, Интернетри списокра рекрутинг компанийĕсем 28 таран. Вĕсенчен вуннăшĕ пулăшушăн укçа илмест. Кадр агентствинче сирĕнтен нухрат ыйтаççĕ тĕк /тепĕр чухне маларах хывма хистесен пушшех/ сисчĕвленмелле: кунашкаллипе çыхăнма юрать-и? Чылай агентство пушă ваканси пирки пĕлтернĕшĕнех тÿлеттересшĕн, ку хыпаршăн ĕçлев центрĕсем пĕр пус та илмеççĕ.
Чăваш Енĕн халăха ĕçпе тивĕçтерекен патшалăх служби çулленех Раççейĕн инçетри регионĕсенчи предприяти-организаципе, уйрăмах сезон вăхăтĕнче чылай çĕрте рабочисем çитменнине шута илсе, килĕшÿсем тăвать. Ĕç миграцине Чăваш Республикинчи халăха 2011-2013 çулсенче ĕçпе тивĕçтермелли ведомство программипе килĕшÿллĕн йĕркелеççĕ.
Республикăра ĕç вырăнĕсем ÿссе пынине пăхмасăр Раççей Федерацийĕн ытти регионĕнче вăй хурас тĕллевлĕ граждансен йышĕ чакмасть. Ун пеккисем уйрăмах ялта пурăнакансен хушшинче нумай. Чăваш Енĕн халăха ĕçпе тивĕçтерекен патшалăх служби ĕç шыракансене тата учетра тăракансене республика тулашĕнче ĕçе вырнаçтарас тĕллевпе Мускав, Волгоград, Воронеж облаçĕсенчи агропромышленноç предприятийĕсене çур акинче ĕçлеме, Владимир, Чулхула облаçĕсенчи строительство организацийĕсене, Тюмень облаçĕнчи пулă тирпейлекен предприятисене, Саха /Якути/ Республикинчи, Амур облаçĕнчи ылтăн кăларакан организацисене ярать. 2011 çулта çапла майпа республика тулашĕнче 1115 çынна вырнаçтармалла.
Кăçалхи çурла уйăхĕн 1-мĕшĕ тĕлне патшалăх ĕçлев служби Раççей Федерацийĕн 10 регионĕнчи 24 организаципе граждансене йышăнмашкăн килĕшÿ çирĕплетнĕ, вĕсем тăрăх пĕрремĕш çур çулта республика тулашĕнче 500 ытла çынна вырăн тупса панă, çав шутра центрсенче учетра тăракан 53 граждана.
Чăваш Енĕн ĕçлев службинче тепĕр региона куçса каяс тĕллевлисем пирки кăтартусен банкĕ пур, ăна район-хулари службăсем çитернĕ сведенисене тĕпе хурса йĕркеленĕ. Малашлăхра ĕçлев службисенче вакансисен банкĕн тата патшалăх пулăшăвĕн переченĕн электрон терминалĕсене /инфоматсене/ лартмалла.
2011 çулта Чăваш Енре пурăнакансен ĕç мобилизацине хавхалантармашкăн вĕсене вырнаçтарас тĕллевпе ытти регионти патшалăх ĕçлев службисемпе çыхăнса килĕшÿсем тума палăртнă.
Паянхи кун тĕлне çакăн йышши хутшăнусене 12 регионти служба органĕсемпе алă пусса çирĕплетнĕ, вĕсен шутĕнче - Омск, Рязань, Тюмень, Волгоград, Воронеж, Чулхула, Киров, Мускав, Ленинград облаçĕсем, Чукотка автономи округĕ, Мари, Саха /Якути/ республикисем.
Хуçалăхсенче рабочисем общежитисенче пурăнаççĕ, вĕри тата ăшă шыв, гигиена тата апат хатĕрлемелли пÿлĕмсем пур, оборудованиллĕ столовăйсем ĕçлеççĕ. Шалăва ĕçлев саккунĕсемпе килĕшÿллĕн тÿлеççĕ.
Рабочисенчен чылайăшĕ Саха /Якути/ Республикинчи “Дражник” старательсен артелĕ” ОООна темиçе çул тухса каять ĕнтĕ. Унта пынисене пурне те ăшăтса тăракан хăтлă общежитие пурăнма вырнаçтараççĕ, вĕсенче вĕри тата сивĕ шыв, çăвăнмалли пÿлĕмсем пур. Рабочисем столовăйра шалу шучĕпе апатланаççĕ. Уйри условисенче тăрăшакансене ятарлă тÿлевпе тивĕçтереççĕ. Шалу - сдельщинăна тата премие кура. 2010 çулта специальноçа тата плана тултарнине шута илсе кунне вăтамран 1300 тенке ларнă. Старательсен артелĕн сезонлă ĕçне тĕпе хурса çынсемпе çак тапхăр вĕçленсен тата ылтăн кăлармалли плана тултарнă тăрăх татăлаççĕ. Вырăна çитнĕ кашни рабочипе пĕр уйăхлăх тĕрĕслев иртсен ултă уйăхлăх уйрăм контракт тăваççĕ. Ĕç вырăнне çитмелли çул укçине предприяти тÿлет.
Ентешсем мĕнле условисенче пурăнни тата ĕçлени пирки ĕçлев служби янипе çĕр-шыври тĕрлĕ объектра 20 çул ытла тăрăшнă Владимир Стратилатов каласа парать:
- Ĕçлев службипе паллашиччен хам тĕллĕн республика тулашне темиçе те тухса кайнă. Кашни иккĕмĕш хутĕнчех улталатчĕç. Иртнĕ ĕмĕрĕн 90-мĕш çулĕсенче асăннă службăн рабочисене сезонлăх ĕçе яракан яваплă çыннипе тĕл пулма тиврĕ, Камчаткăна çитме май пурри çинчен пĕлтерчĕ вăл. Унăн сăмахĕсем пуçран тухмарĕç. Тепĕр уйăхранах Петропавловск-Камчаткăна иваси тытма тухса кайрăм. Укçа кăна мар, çĕкленчĕк кăмăл хавхалантарчĕ мана: вулкансене, çут çанталăка курас килчĕ. Шалу та лайăх. Треска, хĕрлĕ пулă сахал мар тирпейлерĕмĕр. Сахалин çывăхĕнчи базотралл флотĕнче тăтăмăр.
2003 çулта ĕçлев служби пулăшнипе Ямал çурма утравĕ çинчи Тазов пулă комбинатĕнче ĕçлерĕм. Çу кĕске унта, ытларах поляр кунĕ тăрать, вăрăм туна питĕ нумай, пулă вăхăчĕ виçĕ уйăха кăна пырать. Çĕртмере çитрĕмĕр те юпа уйăхĕнче тухса килтĕмĕр - 50-60 градус сивĕ. Çав çулсенче сезонра 300-шер пин тенкĕ илнĕ.
Пилĕк çул каялла служба янипе Якутие çул тытрăм - ылтăн кăларнă çĕрте платник пултăм. “Звездочка” поселокра тăрăшрăмăр. Ылтăн кăларнине кура шалу тÿлеççĕ, плана çулленех ирттерсе тултарнă. Йăла условийĕсем пирки мĕн каламалла-ха? Хăвăрах танлаштарăр: вырсарни кун - канмалли. Телевизор - кашни пÿлĕмре, видео пур тата душевой. Шалу шучĕпе столовăйра апатлантараççĕ, лавккара та çак мелпех тавар туянатпăр.
Ĕçлев служби пулăшнипе кирлĕ чухлĕ стаж пухса тивĕçлĕ канăва тухрăм.
Ĕçе вырнаçас ыйтусемпе Чăваш Енĕн халăха ĕçпе тивĕçтерекен службине
55-26-85 телефонпа
шăнкăравламалла.