Публикации » Çăм атă йăвалакан ăста

Апрелĕн 5-мĕшĕнче район администрацийĕн пуçлăхĕ Ю.Иванов Штанаш ялĕнчи З.Ильинана Хисеп грамотипе наградăланă.

Зоя Викторовна Ильина 9 çул ытла Çĕнĕ Шупашкарти ача çуратмалли çуртăн тин кăна çут тĕнчене килнĕ пепкесен уйрăмĕнче медицина сестринче тимленĕ. Çавăн пекех пурнăç çулĕнче унăн санитарка, фармацевт, воспитатель тивĕçĕсене те пурнăçлама тивнĕ. Хуларан Штанаш ялне пурăнма куçса килсен ăна хăйне валли тивĕçлĕ ĕç тупма йывăр пулнă. Çавна май вăл 2009 çулта районти ĕçпе тивĕçтерекен центра учета тăрать.

2010 çулта Чăваш Республикинчи ĕç рынокĕнчи кăткăслăха сирсе ярас тĕллевпе йышăннă республика программи вăя кĕнĕ. Ĕçсĕр граждансене хăйсен ĕçне йĕркелесе яма пулăшакан программăпа çак маттур хĕрарăм та усă курма шутлать. Йĕпреçре пурăнакан тăванĕсем çăм атă йăвалассипе тăрăшнине кура Зоя Викторовна тăван ялĕнче çак ал ĕçне пуçарса ярать. "Çăм атă тăвасси" темăпа бизнес-план хатĕрлесе ăна ăнăçлă хÿтĕленĕ хыççăн З.Ильина иртнĕ çулхи май уйăхĕнчен уйрăм предприниматель пек регистрациленнĕ.

Çăм атă йăваласси нихăçан та çăмăл ĕç пулман. Пурнăçăн черчен пайĕшĕн вăл пушшех те йывăр. Чăтăмлă чăваш хĕрарăмĕн çыпăçуллă аллисемпе ăсталанă çăм атăсем кĕске вăхăтрах сутăнса пĕтнĕ. Заказ паракансем те чылай пулнă.

Ялта бизнесăн çĕнĕ тĕсĕ ăнăçлă аталанса пынине район ертÿçисем асăрхамасăр пултарайман. Çапла майпа кăçалхи апрелĕн 5-мĕшĕнче савăнăçлă лару-тăрура район администрацийĕн пуçлăхĕ Юрий Иванов 2010 çулта инвалидсем хушшинче хăй ĕçне йĕркелессипе чи лайăх проекта тупса палăртассипе иртнĕ республика конкурсĕнче çĕнтернĕ Зоя Ильинана Хисеп грамотипе тата парнепе чысланă.