Публикации » Шанчăка çухатмаççĕ

– Инвалидсен йышĕ çултан-çул чакса пырать, – терĕ районти инвалидсен обществин председателĕ Е.А.Сергеева. – Вăрçă инваличĕсем çинчен уйрăммăн каласа хăвармалла. Сакăр-тăхăр теçетке урлă каçнăскерсем утса та çÿреймеççĕ, общество йĕркеленĕ мероприятисене хутшăнаймаççĕ. Çапах та вут-çулăм витĕр утса тухнисене эпир манмастпăр. Общество членĕсем вĕсене хумхантаракан ыйтусемпе те ĕçлеççĕ. Йывăр шăпаллă çынсене патшалăх тимлĕх уйăрсах тăни савăнтарать. Район центрĕнче те, ав, клуб, лавкка, аптека умĕсенче инвалид коляскипе кĕрсе тухма ятарлă вырăн туса пачĕç. Ырă тĕслĕх туллиех.

Пурнăçра ырри ытларах ĕнтĕ. Çапла пулмалла та. Евдокия Андреевнапа общество активисчĕсем инвалидсен пурнăçне савăнăçлăрах, интереслĕрех туса пыма тăрăшаççĕ. Вăл каланă тăрăх, кăçал йывăр шăпаллă çынсем Элĕкри сывлăха çирĕплетмелли комплексра иртнĕ спорт уявĕсене темиçе хутчен те хутшăннă. Тĕрлĕ ушкăнри инвалидсем ветерансен хорне хутшăнса пултарулăхпа савăнтараççĕ. «Надежда» клуба çÿрекенсем те вăхăта усăллă ирттереççĕ. Акă Березовкăри вăхăтлăх пурăнмалли уйрăмри П.И.Васюкова 90 çул тултарать. Çулĕсене кура мар вăл вăр-вар çÿрет, çивĕч калаçать, концертсенче сцена çине тухса чăваш халăх юррисемпе савăнтарать.

Ĕçлеме те ÿркенмеççĕ вĕсем. Кăçалхи 11 уйăхра халăха ĕçпе тивĕçтерекен центра хевтесĕр çынсем 19-ăн ĕç шыраса пынă. 15-шне ĕç вырăнĕ тупса панă ĕнтĕ.

Çапла, инвалидсем нихăçан та шанчăка çухатмаççĕ, пурнăçпа тан пыма тăрăшаççĕ.

Пурнăçри тĕрлĕ сăлтавсене пула инвалид пулса юлнисем районта 1200 ытла çын шутланать, вĕсенчен ачасем – 100 ытларах. Инвалидсен обществинче 247 çын тăрать.