Публикации » "950 çынна ĕç вырăнĕ тупма пулăшрăмăр"

Районта та, республикăри пекех, çынсене ĕçпе тивĕçтерме пулăшакан программа ĕçлет. Çак кунсенче ку енĕпе районти лару-тăру пирки халăха ĕçпе тивĕçтерекен центрăн директорне Игорь Анатольевич Федорова каласа пама ыйтрăмăр.

Пирĕн 2007-2010 çулсенче ĕçпе тивĕçтерме пулăшакан тĕллевлĕ программа ĕçлет.Çавăн пекех финанспа экономика кризисĕ пынă май ĕçсĕрлĕх ÿсессине чакармалли тата тепĕр программа пур. Ăна çулталăк пуçламăшĕнче халăха 2009 çулта ĕçпе тивĕçтерессине хушма пулăшу кÿрес тĕллевпе йышăннă. Программăна пурнăçа кĕртме района çулталăкне пĕтĕмпе 10 миллион тенкĕ ытла уйăрнă (кун пекки служба историйĕнче халиччен пулман). Калас пулать, малтанах район валли çичĕ миллион та тăхăр çĕр пин тенкĕ ытла панăччĕ, октябрь уйăхĕ вĕçĕнче пирĕн пата тата виçĕ миллион тенкĕ ытла çитрĕ. Ку укçа-тенкĕне эпир пĕтĕмпех районти предприятисемпе учрежденисене районти ĕçсĕр çынсене ĕç вырăнĕ туса панăшăн уйăрса патăмăр. Кăçалхи январĕн 1-мĕшĕ тĕлне районта ĕçсĕр 203 çын шутланнăччĕ, паянхи кун вара – 182 çын. Çулталăк пуçламăшĕнче пирĕн пата пулăшу ыйтса 750 çын килнĕччĕ, декабрĕн 1-мĕшĕ тĕлне кăтарту ÿсрĕ – 1361 çынна йышăнма тиврĕ.

Çулталăкри кăтартусене пĕтĕмлетнĕ май çакна калама пулать: халăха ĕçпе тивĕçтермелли программăсем çынсене ĕçрен кăларас пулăма чакарма, районта ĕçсĕрлĕх шайĕ ÿсессине сирме тата ĕç шыракансемпе ĕçсĕр граждансене вырнаçтарма май пачĕç. Палăртма кăмăллă, халăха ĕçпе тивĕçтерме хушма пулăшу кÿмелли тĕллевлĕ программăна пурнăçлани кăларса ярас хăрушлăх пур 168 çын валли ĕç вырăнĕ сыхласа хăварма май пачĕ. Асăннă программăна пурнăçа кĕртсе эпир 950 çынна ĕç вырăнĕ тупма пулăшрăмăр. Уйрăмах ку енĕпе "Гидравлика" ТЯО, "Нива" ЯХПК, "ДАР-Бройлер" общество ертÿçисем лайăх ĕçленине палăртмалла. Çитес çул та ĕçпе тивĕçтерессине хушма пулăшу кÿрес тĕллевлĕ программăпа ĕçлеме пăхса хунă, ку енĕпе районти чылай предприятипе учреждени те ĕçлеме кăмăл тунине çырса пĕлтерчĕç. 2010 çулта инвалидсене çăмăллăх кÿмелли майсем те пулĕç.