16 октября 2020 г.
Вăхăт питĕ хăвăрт иртет, пурнăç улшăнса пырать, çавна май хальхи вăхăтри профессисен тĕнчи те урăхла. Иртнĕ ĕмĕрĕн 60-мĕш çулĕсенче пурте космонавт пулма ĕмĕтленнĕ, 90-мĕш çулсенче – юристсемпе экономистсем пуласшăн çуннă. Халĕ вара – инфромаци технологийĕн сферинчи специалистсем, топ-менеджерсем тата ытти специалистсем те «модăра».
Пуласлăх çинчен шкулта вĕреннĕ чухнех шухăшламалла. Çавна май А. Г. Журавлев ячĕллĕ Тĕмшер ялĕнчи пĕтĕмĕшле пĕлÿ паракан шкулăн 7-мĕш класĕнче «Манăн пулас професси» класс сехечĕ иртрĕ. Вĕренекенсем «Хальхи вăхăтри профессисен тĕнчи» презентацие пăхса сÿтсе яврĕç, пĕр-пĕрне ашшĕ-амăшĕн профессийĕсем çинчен каласа пачĕç. Пурне те уйрăмах «Ĕмĕрлĕх клĕшекен професси суйласа илме пулать-и?» ыйту хумхантарчĕ. Кашни хăйен шухăшне пĕлтерчĕ – вĕсем вара кашнин тĕрлĕрен пулчĕç.
В. Афанасьева,
класс ертÿçи.
Первоисточник: Районная газета "Знамя"