17 апреля 2012 г.
Юлашки çулсенче республикăри организацисене рабочисен профессийĕсене илнĕ кадрсем çитмеççĕ. Чăваш Енри ĕçлев службин органĕсем сĕннĕ мĕн пур вакансин 80% яхăн пайĕ - рабочисен ĕç вырăнĕсем.
Кăçалхи ака уйăхĕн пуçламăшĕ тĕлне сĕннĕ 14350 вакансирен 11269-шĕ - рабочисен профессийĕсемпе /специальноçĕсемпе/, инженерипе техника ĕçченĕсен тата служащисен должноçĕсем - 3081 единица.
Ĕç паракансене паян уйрăмах çак профессисем /специальноçсем/ кирлĕ: каменщик, электрогазосварщик, слесарь, термист, отделочник, маляр, платник, токарь, фрезеровщик.
Халăхăн йăла ыйтăвĕсене тивĕçтерекен сфера профессийĕсемпе ĕçлекенсене ытларах та ытларах ыйтаççĕ: парикмахерсем, çĕвĕçсем, закройщиксем. Организацисене çавăн пекех поварсем, сутуçăсем, кондукторсем, ытти рабочи кирлĕ. Кăçалхи ака уйăхĕн пуçламăшĕ тĕлне çĕвĕç профессине илнĕ ĕçсĕр 88 çын пуçне вакантлă 613 ĕç вырăнĕ тивнĕ* ĕçсĕр 77 электрогазосварщик валли - 398 ваканси, ĕçсĕр 35 каменщике 167 ваканси сĕннĕ.
Иртнĕ çултанпа ĕç паракансем ĕçлев службин органĕсене сĕннĕ вакансисем тĕлĕшпе пама палăртакан ĕç укçи ÿснин туртăмĕ палăрать. 2011 çул пуçламăшĕ тĕлне кăтартусен базинчи вакансисемпе сĕнекен вăтам шалу 7,8 пин тенкĕпе танлашнă пулсан çулталăк вĕçленнĕ тĕле вăл 13,3 пин таран пысăкланнă.
Республикăри организацисене рабочисен кадрĕсемпе тивĕçтерес тĕллевпе Чăваш Енĕн Халăха ĕçпе тивĕçтерекен патшалăх служби тата ĕçлев центрĕсем тĕллевлĕн вăй хураççĕ. Ĕçсĕр граждансене ĕç рынокĕнче кирлĕ çĕвĕç, электрогазосварщик тата каменщик профессийĕсене вĕрентсе професси енĕпе хатĕрлемелли мероприятисен планне çирĕплетнĕ.
Пуш уйăхĕнче республикăри ĕçлев службин органĕсем кирлĕ профессисен уйăхлăхне ирттернĕ. Çак мероприяти вăхăтĕнче вакансисен ярмăрккисене, ушкăнсене консультаци парассине йĕркеленĕ, вĕренÿ ушкăнĕсене пухнă, асăннă специальноçсемпе çынсене ĕçе йышăнма хатĕр предприятисенче экскурсисем ирттернĕ.
Шупашкар хулин халăха ĕçпе тивĕçтерекен центрĕ пуш уйăхĕн 14-мĕшĕнче ирттернĕ вакансисен ярмăрккине хулари 10 предприяти хутшăннă. «Электросила», «АЛЗА», «ТУС», «СМУ-177», «Бонифаций», «Рассвет» производство пĕрлешĕвĕ тата ыттисем ярмăрккана хутшăнакансене рабочисен вакантлă вырăнĕсене ĕçе вырнаçма сĕннĕ. Çак организацисен представителĕсем сварщик, механосборка ĕçĕсен слесарĕн, инженер, конструктор, каменщик, монтажник, çĕвĕç, закройщик, дизайнер ĕçне вырнаçас кăмăллисене суйланă. Ярмăрккана хутшăннă кашни тăваттăмĕш çынна ĕçе чĕннĕ, 22 çын професси енĕпе хатĕрленмелли тÿлевсĕр курссенче, ĕçлев центрĕ йĕркелекенскерсенче, вĕренме çырăннă.
Халăха ĕçпе тивĕçтерекен служба органĕсем кăçал сварщик, каменщик, çĕвĕç профессийĕсем, ĕç паракансем ыйтакан ытти специальноç енĕпе вĕрентмелли ушкăнсене çине-çинех йĕркелесшĕн. 2012 çул пуçланнăранпа кирлĕ çак виçĕ профессие вĕренме 61 çынна янă, çав шутра 43 çын электрогазосварщике вĕренет, 16-шĕ - çĕвĕçе, 2 çын каменщик ăсталăхне алла илет.
Республикăн ĕç рынокĕнче кирлĕ ăста кадрсене хатĕрлессине йĕркелес енĕпе професси вĕрентĕвĕн учрежденийĕсемпе тачă çыхăну йĕркеленĕ. Кирлĕ профессисен уйăхлăхĕнче Шупашкар тата Çĕнĕ Шупашкар хулисен халăха ĕçпе тивĕçтерекен центрĕсенче вĕренÿ вырăнĕсен ятарлă ярмăрккисене ирттернĕ, ĕçсĕр граждансене професси енĕпе вĕрентмелли пулăшу ĕçĕсем кÿмелли уçă конкурссенче çĕнтернĕ профвĕренÿ учрежденийĕсен презентацине йĕркеленĕ.
Вĕренÿ вырăнĕсен ярмăрккисене хутшăннисене вĕренÿ çинчен каласа паракан инфомаци материалĕсем, реклама проспекчĕсем панă, вĕренÿ заведенийĕсен информаци стенчĕсемпе паллаштарнă, кăмăл пуррисене хăш профессие килĕштернине палăртмалли тестсем хатĕрлеме май панă.
Электрогазосварщике вĕренес текен ĕçсĕр граждансене Çĕнĕ Шупашкарти «Волгонефтехиммонтаж» фирмăна экскурсие илсе кайнă. Вĕсем предприятин производство цехĕсенче пулнă, ĕç режимĕпе, професси енĕпе хăпармалли, ăсталăха ÿстермелли майсемпе паллашнă.
Çĕнĕ Шупашкар тата Улатăр хулисен халăха ĕçпе тивĕçтерекен центрĕсем ĕçсĕр граждансем валли «Аист» мануфактура» предприятире, «Лекс-Фэшн» çĕвĕ фабрикинче экскурсисем ирттернĕ. Предприятисене иккĕшне те çĕвĕçсем, çĕвĕ производствин ытти ĕçченĕ кирлĕ. Вакантлă вырăнсене йышăнакансене сĕнекен шалу виçи - 8-12 пин тенкĕ.
Ăста рабочисем çитменнипе çыхăннă çивĕчлĕхе татса парас, рабочисен профессийĕсен сумне çĕклес тĕллевпе республикăн ĕçлев службин органĕсем ака уйăхĕн 16-20-мĕшĕсенче «Эп рабочи пулăттăм!» девизпа волонтер-профориентаторсен массăллă акцине ирттереççĕ. Унăн тĕллевĕ - пĕтĕмĕшле пĕлÿ паракан учрежденисен вĕренекенĕсене пулас профессие суйласа илме пулăшасси, Чăваш Республикинчи ĕç рынокĕнчи лару-тăру çинчен пĕлтересси, рабочисен промышленноçра, строительствăра, ял хуçалăхĕнче йăлана кĕнĕ профессийĕсен ят-сумне çĕклесси.
Çак акци мероприятийĕсене ирттермешкĕн ял хуçалăх организацийĕсенче, промышленноçра, халăх ыйтăвĕсене татса парас енĕпе рабочи специальноçĕпе нумай çул ĕçленĕ ветерансен йышĕнчи волонтерсене, рабочисем кирлĕ организацисен представителĕсене, педагога вĕреннĕ ĕçсĕр граждансене явăçтарма палăртнă. Халăха ĕçпе тивĕçтерекен служба органĕсем аслă шкулсемпе техникумсен студенчĕсене, шкулсен преподавателĕсене, библиотека ĕçченĕсене, ĕç паракансене çак акцие ирттермешкĕн волонтер пулса хастар хутшăнма чĕнеççĕ.
Источник: "Хыпар"