17 марта 2015 г.
Тăрмăшри вăтам шкула амăшĕсемпе асламăшĕсем килчĕç. 3-мĕш класри хĕрачасем ташласа, юрласа савăнтарчĕç. Сăвă конкурсĕ те пулчĕ. Настя Симушкина хăй çырнă "Юратнă аннеçĕм" сăввипе паллаштарчĕ. Лариса Алексеевна Тăвайри ветлечебницăра чылай çул вăй хурать. Икĕ хĕрĕ шкулта вĕренеççĕ. Вика - 6 класра, Настя - 3-мĕшĕнче. Хĕрачасем спортпа туслă, юрра-ташша та ăста, обществăлла ĕçре те хастар.
Кирилпа Камила Яшуткинсем асламăшне халалласа "Тавтапуç, асанне" ятлă сăвă ăсталанă. Зинаида Петровнан куççулĕ те тухрĕ, мĕншĕн тесен тăлăх йĕкĕрешсене пăхать-çке вăл. Ачасем маттур, аван вĕренеççĕ.
Вика Степанова пĕчĕк калав çырнă амăшĕ çинчен. Вĕсен çемйинче 4 ача. Асли Дима 9 класра пĕлỹ пухать. Шкулта лайăх вĕренеççĕ, спортпа туслă, йăмăкĕсене пăхма пулăшаççĕ. Максим Григорьев ташлама юратать, асламăшне Галина Викторовнана та пĕрле ташлаттарчĕ.
Ачасем "Путене" фольклор ушкăнне çỹреççĕ, чăваш халăх юррисене юрлама, ĕлĕкхи йăла-йĕркесене упрама хăнăхса ỹсеççĕ. Чăваш вăййине кăтартрĕç ачасем, видеопрезентаци курчĕç.
4-мĕш класс ачисем тĕрлĕрен конкурссем ирттерчĕç (Н.Максимова класс ертỹçи). Пĕрремĕшсем те илемлĕ чечексем ăсталанă амăшĕсем валли (Н.Москвина). 2-мĕшсем (З.Андреева) тĕрлĕрен хитре япаласем тунă, 3-мĕшсем ỹкерчĕксемпе тĕлĕнтерчĕç. Арçын ачасем хĕрачасене парнесем пачĕç, пылак çимĕçпе хăналарĕç. Уява аслисем те хастар хутшăнчĕç.
Е.МАТРОСОВА.
Источник: "Ял ĕçченĕ"