07 февраля 2014 г.
Иртнĕ шăмат кун волейболла выляссипе Вячеслав Георгиевич Васильевăн астăвăм турнирĕ пулчĕ. Кăçалхипе 15-мĕш хут иртрĕç районти уçă ăмăртусем.
Çанталăкĕ сивĕрех пулсан та кĕрешĕве 10 команда тухрĕ: яланхи пекех Шупашкарти “Старко” тата “Дорстрой”, Тăрмăш, Тăвай, Тушкил çамрăкĕсем, пуçласа хутшăнакансенчен Шупашкарти “РЭМИСС”-а (юсавпа строительство организацийĕ), “Урмарская КСО”-на, Куславккапа Нăрваш çамрăкĕсене тата ДЮСШ волейболисчĕсене асăнмалла.
Турнира Гимн кĕввипе савăнăçлă лару-тăрура уçнă. Волейбол уявĕ ячĕпе участниксене, райадминистраци пуçлăхĕн çумĕ О.Ломоносов, Тăрмăш ял тăрăхĕн пуçлăхĕ В.Разин, Вячеслав Васильевичăн çемйи саламласа ăнăçусем суннă.
Командăсем икĕ ушкăна пайланса вылярĕç: пĕрисем – ФСКра, теприсем – Тăвай шкулĕн спорт залĕнче. Ушкăнсенче малти 2 вырăна йышăннисем “хĕреслĕ” вăйăра тĕл пулчĕç: пĕрремĕш вырăн йышăннисем тепĕр ушкăнра иккĕмĕш вырăн йышăннисемпе. Çапла вара çурма финалта “Дорстрой” вăрмарсенчен, “РЭМИСС” “Старкоран” вăйлăрах пулчĕç, финала тухрĕç. 3-мĕш вырăншăн пынă кĕрешÿре опытлăрах “Старко” вăрмарсене 2:0 шутпа парăнчĕ.
Финал çав тери интереслĕ пычĕ. Тĕл пулу пуçламăшĕнче “РЭМИСС” очко хыççăн очко çухатрĕ, 4:0 тытса пычĕ шута “Дорстрой”, анчах пĕрремĕшсем хуçăлмарĕç, хăваласа çитрĕç: 11:11. Унтан – 16:16... 24:24, 25:25. Çавах та 1-мĕш партие çĕнтерчех: 28:26! Шут хăех площадкăна ăсталăх тĕлĕшĕнчен тан командăсем тухнине çирĕплетет. 2-мĕш партире те шут шайлашăнса пычĕ, 17:17, çавах та ытла нумай вăй пачĕ пулас турнира пуçласа хутшăнакан команда, “дорстроевецсем” малтан мала кайса пычĕç те 25:20 шутпа выляса илчĕç. 3-мĕш кĕске партире çамрăкраххисем опытлăраххисен “ура кĕлли çине пусса пычĕç”, çавах та “Дорстрой” кубока алăран вĕçертмерĕ: 15:11. Мĕн чухлĕ ăсталăх, илемлĕ самантсем! Кĕрр! кĕрлерĕ зал мечĕк блока шăтарса тухсан е блок хыççăн çиçĕмле хăвăртлăхпа каялла сетка умне ÿксен. Вĕçлес те килместчĕ тĕл пулăва, çурçĕрччен те, ирччен те пăхма хатĕрччĕ нумайăшĕ финалти тĕл пулăва. Чăннипех турнира илем кÿрекен финал!
Маттур, дорстроевецсем! Кăçалхипе 9-мĕш хут выляса илчĕç вĕсем куçса çÿрекен кубока. Вĕсенчен кая мар “РЭМИСС” волейболисчĕсем те, “Старко” та, çамрăк вăрмарсем те маттур. Шел, Тăвай тăрăхĕнчен пĕр команда та ушкăнсенчен çурма финала шăтарса тухаймарĕ. Турнир-марафона хутшăнакансем вылянине сăнасанах пирĕн енче волейбол йăвашланни сисĕнетчĕ. Халиччен хуть тушкилсем – Шарапов, Алексеев, Матвеев, Моряков палăратчĕç, ăçта вĕсен шайĕнче вылякансем( Командăна тÿрех пуçтараймастăн – ку паллă. Çавăнпа та, тен, Тăвай районĕн çирĕп вылякан шанчăклă пĕр команда тăратмалла сумлă турнира. Пур вĕт-ха пирĕн те “çăлтăр” волейболистсем, анчах вĕсем тĕрлĕ командăсем тăрăх саланнă. Ялан пĕр йышпа вылясан, ăна пултаруллă çамрăксемпе çĕнетсе пырсан, пирĕннисем те “шупках” курăнман пулĕччĕç. Волейбола чĕртес пирки шухăшламаллах!
Турнирта мала тухнă командăсене дипломсемпе медальсем тата асăнмалăх парнесем парса хавхалантарнă. Йĕркелÿ комитечĕ спонсорла пулăшушăн “Янтиковская” МСО” УАО, “Старко”, “Дорстрой”, “СтройТЕК” ООО ертÿçисене, потребительсен обществине, “Шимкусский” ЯХПКна, С.Илларионов, Л.Канясев хресчен фермер хуçалăхĕсене, А.Хумышев предпринимателе, Тăвайри кирпĕч заводне, “Молочный двор–Канаш” СПСКна, “Росгосстрахăн” Тăвайри пайĕн ертÿçине Г.Гаврилова тав тăвать.
И.СОЛОВЬЕВ.
Сăн ÿкерчĕкре: Шупашкарти “Дорстрой” волейболисчĕсем куçса çÿрекен кубокпа.
Источник: "Ял ĕçченĕ"