29 марта 2013 г.
Тăрмăшри культурăпа информаци центрĕнче “Атьăр-ха, депутатсем!” ятлă музыкăлла конкурс иртрĕ. Ку уява хĕрарăм депутатсем хутшăнчĕç. Ял хастарĕсем çинчен кĕскен паллаштарас килет.
Светлана Николаевна Спиридонова страховани агентне ял тăрăхĕн 4-мĕш округĕпе иккĕмĕш хут депутата суйланă ял çыннисем. Маттур хĕрарăм ялти культурăллă-массăллă мероприятисене хастар хутшăнать: спектакльсенчи сăнарсене ăста калăплать, “Тăрмăш” халăх ушкăнĕнче юрлать.
Татьяна Алексеевна Семенова депутат район больницинче ĕçлет, ял çыннисем тĕрлĕ ыйтупа пыраççĕ ун патне. Васкавлă пулăшу пама та яланах хатĕр вăл.
Звенислава Михайловна Матросова – 5-мĕш округпа депутат. Суйлавçăсем кăмăллă ялти перекет кассин ĕçĕпе. Кулленхи ĕçне тивĕçлипе туса пынисĕр пуçне, хăйĕн ăсталăхне сцена çинче кăтартма та вăхăт тупать. Зоя Петровна Григорьева страховани агенчĕ те культура пурнăçĕнче пуçаруллă.
Венера Алексеевна Николаева (10 округ) – Лачкассинчен. Пултаруллă алă ăстине районта кăна мар, ун тулашĕнче те лайăх пĕлеççĕ. Унăн ĕçĕсенчен Тăвайри музейра, акатуйра куравсем йĕркеленĕччĕ. В.Николаева ялта “Ăста алăсем” кружока ертсе пырать. Çакăн пек пултаруллă депутатсем йĕркелерĕç те ĕнтĕ уяв каçне. Артистсенчен кая мар юрларĕç, тĕрлĕ халăх ташшисемпе савăнтарчĕç. Вальс çаврăнчĕç, В.Макаров пулăшрĕ чиперккесене ку номере кăтартма. Тĕрлĕ енлĕ пулчĕ конкурс программи. Пур енĕпе те ăста иккен пирĕн депутатсем: кулленхи пурнăçра та, сцена çинче те.
Любовь Андреева йĕркелесе ертсе пычĕ уява, М.Н.Матросова кĕвĕ-çемĕпе илемлетрĕ. Жюри членĕсем конкурсанткăсене тĕрлĕ номинацире хакларĕç: Т.Семенова – “Çепĕç пике”, З.Матросова – “Сăпайлă пике”, З.Григорьева – “Хаваслă пике”, В.Николаева – “Хитре пике”, С.Спиридонова – “Пултаруллă пике”.
Тăрмăш ял администрацийĕн пуçлăхĕ В.Разин конкурса хутшăннисене саламларĕ, ырлăх-сывлăх, ĕçре ăнăçусем сунчĕ.
“Тăрмăш” халăх фольклор ушкăнĕн членĕсем юрăсемпе хавхалантарса пычĕç.
Первоисточник: "Сельский труженик"