Публикации » Тăрмăшсем çĕнтерчĕç

Волейбол – районта чи аталаннă вăйăсенчен пĕри. Ăна май пур таран халăхра сарма тăрăшмалла. Çакна шута илсе, иртнĕ шăмат кун ял тăрăхĕсем хушшинче мала тухассишĕн ăмăртусем пулчĕç. Тĕмер, Чутей, Мучарпа Элпуç ял тăрăхĕсем командăсем тăратаймарĕç. Вĕсенче, тĕрĕссипе, волейбол аталансах та кайман. Апла пулин те 8 команда кĕрешĕве хутшăнчĕ. Финалта 1-мĕш вырăншăн Тăрмăшпа Тăвай çамрăкĕсем хушшинче çав тери çивĕч кĕрешÿ пычĕ. Вăхăт-вăхăт вылякансем дисциплинăсăрлăх кăтартрĕç, судьяпа тавлашрĕç, ăна кăтартусем пама хăтланчĕç. Спортсменсене воспитани парасси çинчен манмалла мар, тытма пĕлменнисене вăйăран кăларса ярасси таранах мерăсем йышăнмалла.

Финалта çавах та Тăрмăш çамрăкĕсем çиеле тухрĕç. Тăвай ял тăрăхĕн волейболисчĕсем 2-мĕш, йăнтăрчăсем 3-мĕш вырăнсем йышăнчĕç. Çапла нумай çул иртнĕ хыççăн волейболпа тепĕр хут районта мала тухассишĕн пыракан ăмăртусене йĕркелерĕç. Организаторсене уншăн тав тумалла. Уйрăмах Сергей Хумышев предпринимателе тав сăмахĕ каламалла. Вăл пулăшнипе мала тухнисене парнесемпе медальсем парса чыслама пултартăмăр. Вăйăсенче пысăк ăсталăх кăтартнă çамрăксене пайăррăн чысларĕç. Чи пултаруллисен шутĕнче – Д.Капитонов тапăнакан (Тăрмăш), Д.Яковлев пас паракан (Йăнтăрчă), А.Шатунов блок лартакан (Тăвай).

 

Сăн ÿкерчĕкре: турнир çĕнтерÿçи – Тăрмăш ял тăрăхĕн команди.