Публикации » Кунашкалли пулманччĕ-ха (Спорт)

Кунашкалли пулманччĕ-ха (Спорт)

 

Иртнĕ вырсарнире спорткомплексăн уçă площадкинче (картишĕнче) 8 команда 2 ушкăна пайланса мини-футбол вылярĕ. Вăйлисем турнирăн финалти тапхăрĕнче тĕл пулчĕç.

Ăмăртусене тăрмăшсемпе тăвайсем 2-шер команда тăратрĕç. Вăйăсем йывăр условисенче иртрĕç. Ир кÿлĕм шăнса тăни кăнтăрла тĕлне ирĕлсе пĕтрĕ. Юр сапса площадкăна йĕркене кĕртме тăни усса килмерĕ, пушшех шывланса кайрĕ. Тата вичкĕн сивĕ çил вĕретчĕ. Урасем йăр! та яр! шурĕç. Пĕр йĕпенмен, вараланман футболист та çукчĕ. Вратарьсен мечĕке шыв е пылчăк çине выртса тытма тиврĕ. Пăхатăн та çамрăксем çине, вĕсен хусканăвĕнче пĕр сÿрĕклĕх те çук, пурте выляса илесшĕн. Çак условисенче выляма футбола чунтан парăннă çамрăксем кăна пултараççĕ. Мĕн чухлĕ хавхалану, кĕрешÿ хĕлхемĕ вĕсенче! Хăйне евĕр спортри паттăрлăх.

Финал тапхăрне тăрмăшсен икĕ команди, Тăвайри футбол клубĕ тата Çăлпуç çамрăкĕсем тухрĕç. Тăрмăшсен 1 команди теприне, тăвайсем çăлпуçсене çĕнтерчĕç. Финалта тăрмăшсем тăвайсенчен 3:2 шутпа выляса илчĕç. 3-мĕш вырăншăн тăрмăшсен 2-мĕш командипе çăлпуçсем тупăшрĕç. Ушкăнри вăйăра та тĕл пулнăччĕ иккĕшĕ, ун чухне тĕл пулу 2:2 шутпа вĕçленнĕччĕ, анчах ку хутĕнче çăлпуçсем 0:4 шутпа çухату тÿсрĕç. Çапла вара тăрмăшсен пĕрремĕш команди куçса çÿрекен кубока çĕнсе илчĕ. Команда чысне В.Васильев вратарь, Павел Иванов, Николай Георгиев, Игорь Афанасьев, Алексей Иванов, Виктор Звонарев, Андрей Андреев хÿтĕлерĕç. Çакна та палăртмалла: Павелпа Андрейăн ашшĕсем – Сергей Ивановпа Морис Андреев – иккĕшĕ те паллă футболистсем, Ленин ячĕллĕ хуçалăхăн футбол командинче нумай çул ăнăçлă вылянă.

Мини-футболра тăвайсем 2-мĕш, тăрмăшсен 2-мĕш команди 3-мĕш вырăнсем йышăнчĕç. Çăлпуçсем 4-мĕш пулчĕç. Вĕсен вратарьне Алексей Николаева чи лайăх вратарь тесе палăртма пулать.

Ăмăртусене çавăн пекех пуянкассисем, Тăвайри “Проспект”, нăрвашсемпе мучарсем хутшăннă.

 

Сăн ÿкерчĕкре: турнир чемпионĕ – Тăрмăш футболисчĕсем. Варринче – Василий Васильев вратарь кубокпа.

Э.БУИНЦЕВ сăн ÿкерчĕкĕ.