Публикации » Юратнă ĕçре

Вăл е ку профессипе чылай çул пĕр вырăнтах ĕçлекен çынсем пирĕн районта чылай. Вĕсенчен пĕри – Палтиелĕнчи почта çыхăнăвĕн уйрăмĕн начальникĕ

О. Михайлова. Пĕр улшăнми 28 çул тăрăшать вăл çак яваплă ĕçре. Хăйĕн ĕçне çулран-çул тÿрĕ кăмăлпа пурнăçласа пынă май, Ольга Филипповна ял-йыш хисепне тивĕçнĕ.

– 1984 çулхи октябрьте мана, Палтиел вăтам шкулĕнче делопроизводительте ĕçлекенскере, ял Совечĕн председателĕ Нягим Хабибуллов тата Елена Федорова (хĕр чухнехи хушамачĕ Константинова) секретарь ялти почта çыхăнăвĕн уйрăмĕн начальникĕн должноçне куçма сĕнчĕç, – каласа парать О.Михайлова. – Куншăн эпĕ пĕрре те ÿкĕнмен. Çак ĕçе эпĕ тÿрех килĕштертĕм. Юратнă ĕç мана пурнăçра яланах вăй-хăват парса пычĕ.

Хăйĕн ĕçне пĕтĕм чун-чĕререн парăннă çын кăна калама пултарать çакнашкал сăмахсене. Ял-йыш та, Елчĕкри почтамтăн тата ял тăрăхĕн администрацийĕсем те Ольга Филипповнăн ĕçĕпе кăмăллă.

Почта çыхăнăвĕн уйрăмĕн начальникĕн ĕçĕ яваплă та тĕрлĕ енлĕ. О.Михайлова халăхран посылкăсем, укçа перевочĕсем йышăнса, вĕсене палăртнă адреспа яма кирлĕ хутсем хатĕрлет, граждансен газпа электроэнерги, сотовăй телефон тÿлевĕсене йышăнать, конвертсемпе открыткăсем сутать, куллен çĕнĕ хаçат-журнал йышăнать, пенси укçисемпе пособисем графикпа палăртнă вăхăтра саланччăр тесе тăрăшать, ытти ĕçсем пурнăçлать. Ял çыннисене яланах кăмăллăн кĕтсе илет, вĕсен тĕрлĕ ыйтăвĕсене туллин тивĕçтерессишĕн çине тăрса ĕçлет.

Коллектив ĕç-хĕлне те профессилле ăсталăхпа йĕркелесе пырать Ольга Филипповна, почтальонкăсемпе килĕштерсе ĕçлет. Почтальонкăсем – ĕçре пуян опыт пухнă çынсем. Палтиелĕнчи Александра Фролова çак ĕçре – 35 çул, Ракия Махмутова – 27 çул, Патирекри Ольга Цыганова – 16 çул, Хайпăлари Татьяна Антонова 7 çул вăй хурать. Почтальонкăсем хаçат-журнала, пенси-пособие çемьесене вăхăтра валеçеççĕ.

Тĕрлĕ хаçат-журнал подпискин ыйтăвĕсене те пысăк тимлĕхре тытаççĕ начальникпа почтальонкăсем. Пĕрлех ялсенчи çемьесенче район хаçатне вулакансен йышĕ ан чактăр, вăл ÿссе пытăр тесе тăрăшаççĕ. Сăмахран, пĕлтĕрхи иккĕмĕш çур çулта "Шăмăршă хыпарне" виçĕ ялта 200 экземпляр илсе тăнă пулсан, кăçалхи пĕрремĕш çур çулта вăл 228 çемьене саланать.

Ĕçри çитĕнÿсемшĕн О.Михайлова сумлă наградăсене тивĕçнĕ. Тĕрлĕ çулсенче ăна "Ĕçри хастарлăхшăн. В.И.Ленин çуралнăранпа 100 çул", "Ĕç ветеранĕ" медальсемпе, Федераллă почта çыхăнăвĕн Чăваш Республикинчи управленийĕн, Елчĕкри почтамтăн, район администрацийĕн Хисеп грамотисемпе чысланă.

Ольга Филипповна – 3 ача амăшĕ (питĕ шел, унăн мăшăрĕ, Аркадий Петрович, хĕрĕх улттăрах вилнĕ). Асли, Елена, 20 çул ĕнтĕ Шăмăршăри линипе техника цехĕнче (ЛТЦ) вăй хурать. Вăталăххи, Алина, Палтиел вăтам шкулĕнче лаборанткăра тăрăшать. Кĕçĕнни, Александр, РФ Шалти ĕçсен министерствин академине пĕтернĕскер, Шупашкарти полици уйрăмĕнче ĕçлет. Телейлĕ кукамăшне 3 мăнук савăнăç кÿрсе тăрать.

Январĕн 13-мĕшĕнче О.Михайлова хăйĕн юбилейне палăртать. Аппăшĕпе йăмăкĕ, хĕрĕсемпе кĕрÿшĕ, ывăлĕпе кинĕ, 3 мăнукĕ, тăванĕсемпе ĕçтешĕсем çумне хутшăнса Ольга Филипповнăна сумлă юбилей ячĕпе ăшшăн саламлатпăр, çирĕп сывлăхпа тулли телей, вăрăм ĕмĕр, ĕçре ăнăçу сунатпăр.