Публикации » Шур халатлă пирĕштисем

Палтиелĕнче пурăнакан Александр Федоровичпа Ольга Григорьевна Якушовсем килĕштерсе, пĕр-пĕрне хисеплесе 61 çул пĕрле пурăнаççĕ. Кун-çулĕ вĕсен хĕрÿ ĕçре иртсе пынă. Çемье пуçĕ "Чăваш Республикин тава тивĕçлĕ механизатор" ята, "Хисеп Палли" ордена тивĕçнĕ. Кил хуçи хĕрарăмĕ те тăван колхозрах вăй хунă – ĕç ветеранĕ. Ĕçчен çынсем халĕ те, çулсем самаях пулсан та – саккăрмĕш теçеткене хыçа хăварса пыраççĕ – алă усса лармаççĕ.

Якушовсем пилĕк ача çуратса пурнăç çулĕ çине кăларнă. Пурне те тивĕçлĕ воспитани панă, çĕр-шыва юрăхлă çынсем пулма пехилленĕ. Пĕр ывăлпа (Анатолий) тăватă хĕр (Нина, Антонина, Елена, Ирина) пурнăçри хăйсен вырăнĕсене тупнă, пурте кăмăлĕсене каякан ĕçсенче вăй хураççĕ.

Мĕн тĕлĕнтерет-ха Якушовсен çемйи пирки калаçу пуçарсан; Вĕсен виçĕ хĕрĕ медицина çул-йĕрне суйласа илнĕ. Çак йĕрпех 5 мăнукĕ кайнă. Ывăлĕн Анатолийĕн мăшăрĕ те – медицина ĕçченĕ. Тĕплĕнрех паллашар-ха шур халатлă çынсемпе.

Медицина ĕçченĕсен династине пуçласа яраканĕ – Нина Александровна Якушова (Кузьмина), Палтиелĕнчи çемье тухтăрĕн пĕтĕмĕшле практикин офисĕн фельдшерĕ. Канашри медицина училищинчен вĕренсе тухнă. Пĕтĕмĕшле ĕç стажĕ – 38 çул.

Унăн ывăлĕ – Юрий Геннадьевич Кузьмин, (1978 ç.) васкавлă медицина пулăшăвĕн фельдшерĕ. Канашри медицина училищинче ăс пухнă. Шупашкарта ĕçлесе пурăнать, ĕç стажĕ – 14 çул.

Елена Александровна Якушова (Железова), стоматологи кабинечĕн медицина сестри. Шупашкарти медицина училищинче вĕреннĕ. Сосногорск хулинче ĕçлесе пурăнать. Ĕç стажĕ – 31 çул.

Унăн хĕрĕ – Ирина Константиновна, медицина сестри. Ухтари медицина училищине пĕтернĕ. Ĕç стажĕ – 15 çул.

Ирина Александровна Якушова (Паймина) (1963 ç.), районти тĕп больницăн терапи уйрăмĕн медицина сестри. Канашри медицина училищинчен вĕренсе тухнă. Ĕç стажĕ – 31 çул.

Унăн ывăлĕ – Алексей Витальевич Паймин (1986ç.), районти тĕп больницăн васкавлă медицина пулăшăвĕ паракан уйрăмĕн фельдшерĕ. Канашри медицина училищинче вĕреннĕ. Ĕç стажĕ – 5 çул.

Сергей Владимирович Фролов (1981 ç.), Антонина Александровна Якушован ывăлĕ, районти тĕп больницăн васкавлă медицина пулăшăвĕ паракан уйрăмĕн фельдшерĕ. Канашри медицина училищинче ăс пухнă. Ĕç стажĕ – 9 çул.

Ольга Владимировна Фролова (1988 ç.), Антонина Александровнан хĕрĕ, васкавлă медицина пулăшăвĕ паракан уйрăмĕн фельдшерĕ. Шупашкарти медицина училищинче вĕреннĕ. Шупашкарта ĕçлесе пурăнать. Ĕç стажĕ – 2 çул.

Светлана Михайловна Кузьмина (Якушова) (1955 ç.), районти тĕп больницăн медицина сестри. Шупашкарти медицина училищинче пĕлÿ илнĕ. Ĕç стажĕ – 39 çул.

Якушовсен ĕç династийĕн пĕтĕмĕшле стажĕ 183 çулпа танлашать. Вĕсен пархатарлă та сумлă ĕçĕпе мухтанмалли çеç юлать. Вĕсене пире сыватакан пирĕштисем тесе калас килет.