Публикации » Çитмĕл пиллĕкре – çитмĕл хур

КУÇ хăрать те алă тăвать. Çапла калама юратать Палтиелĕнче пурăнакан И.Герасимов. Çитмĕл пиллĕкре пулсан та ĕçсĕр ларма пултараймасть вăл – куллен вăй хуни уншăн йăпанăç çеç тейĕн.

Пĕчченех пурăнать хальхи вăхăтра Иван Викторович. Апла пулин те çакна туймасть вăл, тепĕр тесен, вăхăчĕ те çук. Калама кăна вĕт: çитмĕл пиллĕкри пĕччен арçын килте çитмĕл хур усрать. Анкарти хыçĕнчех çырма та, унпа епле усă курмăн-ха; Чăх-чĕп те йышлă, автанĕ те ăратлă.

Качакасем те усрать И.Герасимов, çавăнпах сĕтрен те татăк тăмасть.

Иван Викторовичăн тепĕр йăпанăçĕ – пыл хурчĕсем. Миçе вĕлле иккенне калама хушмаççĕ те, хăй каланă тăрăх, самаях. Пылак продукци сутмалăх та юлать, хăшне-пĕрне вара унпа ахалех хăналать.

Пахчи те тирпейлĕ пĕччен арçыннăн. Çĕр улмипе чĕкĕнтĕрсĕр пуçне вăл унта тĕрлĕ çимĕç, утăлăх курăк çитĕнтерет. Пушă вăхăтра И.Герасимов пулла çÿреме те кăмăллать.