Публикации » Сăн-пит илемлĕхĕ çинчен

Палтиелĕнчи культурăпа кану центрĕн директорĕ Т.Долгова çамрăксем валли мероприятисем йĕркелессине тимлĕхре тытать. Акă нумаях пулмасть вăл хĕрсемпе "Сăн-пит илемлĕхĕн вăрттăнлăхĕсем" темăпа калаçу ирттерчĕ.

Тĕл пулăва тĕплĕн хатĕрленсе килнĕ клуб учрежденийĕн пуçлăхĕ. Пит-куçа, ÿт-тире чылай çул тирпейлĕ те илемлĕн курăнма май паракан меслетсем пирки çырса кăтартнă хаçат-журналти статьясемпе, канаш-сĕнÿпе усă курса вăл хĕрсемпе интереслĕ калаçу йĕркелерĕ.

– Яланах илемлĕ юлас тесен, хăвна куллен пысăк тимлĕх уйăрмалла, – терĕ Татьяна Николаевна. – Çын миçере пулни – вун улттăра-и е утмăлта – уйрăмлăх çук. Çамрăклăха тата сăн-пит илемне вăрах вăхăт упрас тесен физкультурăна юратмалла (спорт залне тăтăш çул тытни питĕ вырăнлă), тĕрĕс апатланмалла, ÿт-тире гигиена тĕлĕшпе тирпейлĕ тытмалла. Ÿте тасалăхра тытманни чир-чĕр патнелле илсе пырать.

Калаçăва малалла тăсса, Т.Долгова çакна асăнчĕ: организмра шлаксем, çусем, токсинсем, алкоголь никотин нумай пулни ÿтре те палăрать. Тĕрĕс апатланас тесен, рационра йÿçĕхнĕ сĕт продукчĕсем, ытларах пахча-çимĕç, улма-çырла пулмалла. Пылак çимĕçе, çуллă тата ăшаланă апата кăмăллани ÿт-пÿре те, сăн-питре те палăрма пултарать.

Витаминсем ĕçни, спортпа туслă пурăнни, вăхăта ытларах уçă сывлăшра ирттерни, лайăх çывăрса тăранни организмшăн питĕ усăллă. Çамрăк чухне косметикăпа вырăнлă усă курни сăн-пите илем кÿрет. Çулланнă хĕрарăм сăн-питне крем сĕрни вырăнлах мар. Вăхăт иртнĕçемĕн ÿт крема хăнăхма пуçлать, ăна пăхса тăма йывăрланать.

Халăх мелĕсемпе усă курса çÿçе, чĕрнесене пăхса тăрасси пирки те пычĕ çавра сĕтел хушшинчи калаçу.

Хĕрсем хăйсем усă куракан илемлĕх вăрттăнлăхĕсемпе паллаштарчĕç. Юлашкинчен хăйсемшĕн уйрăмах усăллă статьясемпе заметкăсене тишкерчĕç, хăш-пĕр сĕнÿсене тетраде çырса хучĕç.