22 октября 2011 г.
ОКТЯБРĔН 19-мĕшĕнче районта Пĕрлĕхлĕ информаци кунĕ иртнĕ. Унăн тĕп темисем – кĕрхи уй-хир ĕçĕсене вĕçлесси; халăх пурнăçне малалла лайăхлатас тĕлĕшпе патшалăх йышăнакан мерăсем çинчен çынсене ăнлантарса парасси. Район администрацийĕн пуçлăхĕн пĕрремĕш çумĕ В.Н. Никифоров тата Чăваш Республикинчи халăха ĕçпе тивĕçтерес тĕлĕшпе ĕçлекен Патшалăх службин ертÿçи С.П. Димитриев "Искра" СХПКра пулнă. Ял хуçалăх предприятийĕн председателĕ М.Х. Хамдеев кунти ĕçсемпе паллаштарнă. Патирексем çĕр улмипе силослăх куккуруса юлашки гектарсем çинчен пуçтарса кĕртеççĕ. Пĕрмаях çумăр çунине пăхмасăр, 300 гектар кĕрхи тулă акнă, çĕртме сухи тăвасси малалла пырать. Выльăх çимине çулталăк çурăлăх хатĕрленĕ. Кăçал кунта мăйракаллă шултра выльăхсем усракан фермăна тĕпрен реконструкциленĕ. Хальлĕхе 184 пуç ĕне выльăх, 130 пуç сысна, 19 пуç лаша усраççĕ, выльăхсен йышĕ ÿссех пырать. Хуçалăхăн октябрĕн 1-мĕшĕ тĕлне ĕç укçи парăмĕ çук. Информаци ушкăнĕ çавăн пекех Патирекри тĕп шкул коллективĕпе те тĕл пулса калаçнă. Район администрацийĕн пуçлăхĕн çумĕ В.А. Петьков тата Чăваш Республикинчи стандартизаци, метрологи тата сăнав патшалăх центрĕн директорĕ С.П. Абрамов Палтиел ял поселенийĕнче, район администрацийĕн культурăпа архив ĕçĕн секторĕн заведующийĕ А.Н. Ларшникова тата Чăваш Республикинчи электронлă тата кино документацийĕн патшалăх архивĕн директорĕ Н.И. Медведев Васан ял поселенийĕнче, район администрацийĕн юридици секторĕн заведующийĕ В.И. Дмитриевпа Чăваш Республикинчи çут çанталăк ресурсĕсемпе экологи министрĕн çумĕ Е.В. Юшин Шăмăршă ял поселенийĕнче пурăнакансемпе тĕл пулса калаçнă, ял çыннисен ыйтăвĕсем çине тулли хурав панă.
Источник: "Шăмăршă хыпарĕ"