17 мая 2008 г.
М.КАРИМОВ (Сăрнай Мишши) 1918 çулхи майăн 15-мĕшĕнче Виçпỹрт Шăмăршă ялĕнче вăтам хресчен çемйинче çуралнă. Шкул пĕтернĕ хыççăн учительсем хатĕрлекен институтран вĕренсе тухнă та чăваш чĕлхипе литература вĕрентекенĕ пулса ĕçлеме тытăннă. Михаил Васильевич 1939 çулхи январь уйăхĕнче Хĕрлĕ Çара кайнă, Сывлăш Çарĕсен истребительсен полкĕнче хĕсметре тăнă. 1940 çулхи августран пуçласа 1942 çулхи январь уйăхĕччен политрук çумĕ пулнă. Ун хыççăн _ 1942-1943 çулсенче _ Мускав фронтĕнче, 1944-1945 çулсенче строевой чаçри штаб начальникĕн çумĕ. Вăрçă çулĕсенче М. Каримов II степень Аслă Отечествăлла вăрçă орденне, "Германие çĕнтернĕшĕн", "Мускава хỹтĕленĕшĕн" тата ытти медальсене тивĕçнĕ. Тăван яла М.Каримов 1947 çулхи декабрь уйăхĕнче таврăннă. Тăхтаса тăмасăрах хăйĕн юратнă ĕçне кỹлĕннĕ. Малтанласа Тутар республикине кĕрекен Çĕнĕ Кахăрлă ялĕнче вырăс чĕлхипе литературине, унтан Вырăс Чукалĕнче, Васанта чăваш чĕлхипе литературине вĕрентнĕ. Чунĕ вара унăн тăван ялах туртнă, юлашкинчен Виçпỹрт Шăмăршă ялĕнчи сакăр çул вĕренмелли шкулта вăй хунă. Михаил Васильевич шкулта ĕçленĕ хушăрах вĕренекенсем валли 1971 çулта "Чăваш литератури" вĕренмелли кĕнеке кăларма май тупать. Çав кĕнекепе чăваш ачисем пĕр çул çеç мар усă курнă. Вăл район хаçачĕпе те питĕ туслă пулнă. Унăн сăвви-калавĕсем, статйисем хаçатра тăтăшах пичетленетчĕç.
Источник: "Шăмăршă хыпарĕ"