17 января 2025 г.
ÇАК эрнере массăллă информаци хатĕрĕсенче ĕçлекенсем икĕ пысăк уява - Раççей тата Чăваш пичечĕн кунĕсене - паллă тăваççĕ.
Хальхи вăхăтра Чăваш Республикинче массăллă информацин 142 хатĕрне регистрациленĕ, çав шутра 81-ĕшĕ _ пичет изданийĕсем. Ытти ĕçтешсемпе пĕрлех, «Шăмăршă хыпарĕ» хаçат редакцийĕ те професси уявне пысăк хавхаланупа кĕтсе илчĕ. Пирĕн хаçат пурнăçпа тан пынине, вулакансем ăна юратнине 2025-çулхи пĕрремĕш çур çул тиражĕ ỹсни те çирĕплетет. Журналистсем республика конкурсĕсене хутшăнса I степень Диплома тивĕçни те _ ырă тĕслĕх.
Массăллă информаци хатĕрĕсене 2030-çулчченхи тапхăр валли комплекслă аталантармалли программăпа килĕшỹллĕн, пирĕн редакци Медиацентра куçма хатĕрленет. Çакă тиража упраса хăварма çеç мар, вулакансен йышне çамрăксене явăçтарма та пулăшасса шанатпăр.
Ан тив, хаçатçăсен ĕç укçи чи пĕчĕккисенчен пĕри пултăр, анчах чунра хавхалану пысăк чухне шалу пирки шутлас та килмест. Уяв ячĕпе саламлатпăр сире, журналистсемпе хаçата çут тĕнчене кăларассишĕн ырми-канми тăрăшакан çынсем, обществăлла корреспондентсемпе ветерансем!
Н.ИЛЬИНА, «Шăмăршă хыпарĕ» хаçат тĕп редакторĕ.
Источник: "Шăмăршă хыпарĕ"