27 декабря 2024 г.
КĔÇНЕРНИКУН _ декабрĕн 19-мĕшĕ _ редакцире чи хĕрỹ вăхăт: çак кун «Шăмăршă хыпарĕ» хаçата хатĕрлесе типографие ăсатмалла. Пуçа çĕклемесĕр çыратпăр, вулатпăр, йăнăш каясран сыхланса, пĕр материалах икĕ-виçĕ хут та тишкерсе тухатпăр.
Кăнтăрла вăхăчĕ. 12 сехет çитсе пырать. Часах Раççей Президенчĕ Владимир Путин «Тỹрĕ эфира» тухса 2024-çулхи ĕçсемпе тĕплĕн паллаштарĕ, журналистсемпе çĕр-шывра пурăнакансен ыйтăвĕсем çине хуравлĕ.
Никам та киле кайма васкамасть, редакцирех чейпе-кулачпа «хырăма улталаса» Президент сăмахне итлеме хатĕрленетпĕр.
Акă кĕтнĕ самант çитрĕ. Владимир Владимирович, яланхи пекех çирĕппĕн утса, журналистсен умне тухрĕ. 4 сехет те 26 минута тăсăлнă пресс-конференцире Президент журналистсемпе çĕр-шыв гражданĕсен 70 ытла ыйтăвĕ çине туллин хуравларĕ.
Кĕтнĕ пекех, ятарлă çар операцийĕпе çыхăннă ыйтусем пулчĕç.
«Лару-тăру тĕпрен улшăнса пырать, _ терĕ Владимир Владимирович. _ Фронтăн пур линийĕнче те пирĕн çар малалла талпăнать. 100, 200, 300 метр мар _ пирĕн боецсем территорисене тăваткал километрсемпе каялла тавăраççĕ. Эпир ятарлă çар операцийĕ пуçланнă чух палăртнă чăн малтанхи задачăсене пурнăçлама пире никам та чарма пултараймасть».
Президент СВО боецĕсене Раççей паттăрĕсем тесе хакларĕ, çапăçури кашни салтакпа офицера, çавăн пекех фронта пулăшакан кашни çыннах чĕререн тав турĕ.
Çĕр-шыв пурнăçĕпе çыхăннă ыйтусем çине хуравланă май, Владимир Путин демографи ыйтăвĕ çинче чарăнса тăчĕ.
«Эсир пĕлетĕр ĕнтĕ: ача çуратма пултаракан хĕрарăмсен йышĕ пирĕн 30 процент чакнă. Пире хĕр ачасем, хĕрсем кирлĕ. Демографи лару-тăрăвне лайăхлатас тесе, ача амăшĕн капиталне ỹстертĕмĕр. Иккĕмĕш ача çуралнă çемьене 450 пин тенкĕ тỹлетпĕр. Çемье ипотеки те сыхланса юлать.
... Çĕр-шыв территорийĕ пысăк пулни _ лайăх, анчах та çак территорире пирĕн граждансем пурăнни _ чи кирли».
Владимир Владимирович çĕр-шывра апат-çимĕç продукчĕсем çителĕклĕ пулнине те палăртса хăварчĕ. Аш-какайпа эпир хамăра туллин тивĕçтеретпĕр. Тĕнчере кашни çын вăтамран çулталăкра 42 килограмм аш çиет пулсан, эпир _ 80 килограмм. Юлашки çулсенче çĕр-шывра аш-какай çиесси икĕ хут ỹснĕ.
Сĕт пирки те çавнах каламалла _ çак продукта туса илесси çултан çул ỹсет. Çав вăхăтрах сĕте ытларах çиме тытăннине те каламалла. Ĕне çăвĕ хатĕрлеме сĕт çитсе пымасть. Çакă çу хакне 33-34 процент ỹстерсе ячĕ. Ку енĕпе лару-тăру йĕркене кĕрсе пырĕ.
Çу хакĕ ỹсни ял хуçалăх культурисен тухăçĕпе уйрăлми çыхăннă. Виççĕмĕш сăлтав _ тĕнчере апат-çимĕç продукчĕсен хакĕ тăруках пысăкланни.
Владимир Путин ял хуçалăхĕ экономикăн чи пысăк пĕлтерĕшлĕ отраслĕсенчен пĕри пулнине палăртнă май, ялти социаллă ыйтусене татса парасси _ пурăнмалли çурт-йĕр, культура, вĕрентỹ, медицина проблемисене ăнăçлă пурнăçа кĕртесси _ правительствăн кулленхи ĕçĕ пулни çинчен те каларĕ.
«Ятарлă çар операцийĕ вăхăтĕнче эпĕ сахалрах шỹтлеме тытăнтăм, тата кулас та килмест, _ чунне уçса калаçрĕ Владимир Владимирович. _ Çак тапхăр пĕтĕм çĕр-шыва, кашни çынна хытă хумхантарать».
Мана _ журналиста _ Владимир Путин Раççей халăхне, пирĕн салтаксемпе офицерсене çирĕп шанни, Çĕнтерỹ часах пуласса ĕненсе пурăнмалли тата ĕçлемелли çинчен калани питĕ килĕшрĕ.
«Раççее вăйсăрлатас шухăшлисем хытă йăнăшаççĕ, __ терĕ Президент Америкăри NBC канал журналисчĕн ыйтăвĕ çине хуравланă май. _ Паян пачах та урăхла пулса тухать: Раççей Хĕç-пăшаллă Вăйĕсен вăй-хăвачĕ ỹснĕçем ỹсет, çĕр-шыв суверенитечĕ çирĕпленет, пирĕн никама пăхăнманлăх яр-уççăн палăрать».
Ив.САЛАНДАЕВ.
Источник: "Шăмăршă хыпарĕ"