Тилхепене çамрăк тытса пынăранах-тăр, çынсен тăрăшулăхĕ те пысăк: тепĕр чух аслăраххисен те кĕçĕннисенчен вĕренмелли тупăнатех. Ертÿçĕ хăй те пĕр вырăнта ларма пĕлмен çын. Унпа тĕл пулса калаçма та сахал мар кĕтме тиврĕ. Çавах вăл вăхăт тупма пултарчĕ.
– Хресчен пурнăçĕ, ĕçĕ-хĕлĕ çапла вĕт: çулталăкăн кашни тапхăрĕнчех канăç çук. Асаттесемех урапана хĕллех, çунана çуллах хатĕрленĕ. Пирĕн те çак йăлана тытса пырасах пулать, – терĕ В.Абсалямов, эпĕ мĕн пирки сăмах хускатассине туйнăнах.
– Владимир Ильич, эсир урапа-çуна пирки асăнтăр-ха та...
– Халĕ вĕсене ял хуçалăх машинисем, техника улăштараççĕ вĕт. Ĕлĕкхи хатĕрсемпе выльăх-чĕрлĕх ферминче, ялта çеç усă куратпăр.
– Сĕрмен урапа тутăхать теççĕ. Юрать-ха, çуна тупанне сĕрмелле мар...
– Кашни япала – хăй вырăнĕнче: пурне те вăхăтра, пăхса тăмалла. Кирлĕ пек пăхмасан техника вăхăтсăр ванать, юрăхсăра тухать. Халĕ ĕлĕкхи мар – хăпăл-хапăл çĕннине туянаймăн. Пур пеккипе тирпейлĕн усă курма тивет.
– Владимир Ильич, сире ку тĕлĕшпе хурламалли çук-ха.
– Мухтанса каламастăп: ĕçрен пушаннă ял хуçалăх машинисене хĕл каçма упрама лартнă. «Уй-хир карапĕсем» те халех çитес вырмашăн тунсăхлаççĕ. Хирти юлашки ĕçсем вĕçленсен техникăна юсама пуçăнасшăн.
– Тĕпрен илсен, уй-хир ĕçĕсем хыçа юлчĕç ĕнтĕ, пĕтĕмлетÿсем те тума пулать пулĕ;
– Ахаль ларман. Вăхăтра акса-лартса хăвартăмăр, калчасене пăхса çитĕнтерессишĕн те сахал мар вăй хутăмăр. Шел: кăçал çанталăк хресчен майлă пулмарĕ – шăрăха пула палăртнă чухлĕ тухăç илеймерĕмĕр. Пирĕн айăп мар – çанталăка хирĕç кĕрешеймĕн...
– Çавах та, çитес çул ыррине шанас, кĕтес килет-çке...
– Çакна шута илсех çитес çулхи тухăç никĕсне вăхăтра хывса хăварма тăрăшрăмăр. Кĕр тыррисем пысăк тухăç парасса шанас килет. Вăрлăхсем те çителĕклĕ, 86 проценчĕ кондициллĕ. Вăй çитерейсен, тен, вĕсене çĕнетме те май тупăпăр-ха. Тĕш-тырăсемпе пĕрлех пропашной культурăсем те манăçа юлмĕç.
– Ĕлĕк хресчен çĕре лашапа та пулин сухаласа хăварма тăрăшнă.
– Халĕ – урăх вăхăт: суха пуçĕпе шăйăрттарнипех тухăçлă пулаймăн. Пĕтĕм технологие пăхăнса 400 гектар çинче çĕртме сухи туса хăвартăмăр. Çакă çум-курăксене пĕтерме пулăшать, çĕр те ирĕклĕрех сывлать.
– Уй-хиртен фермăсене куçма та вăхăт пулĕ, Владимир Ильич;
– Ку тĕлĕшпе пăшăрханмаллиех çук. Витесем хĕле хатĕр, выльăх апатне çителĕклĕ чухлĕ янтăласа хăварнă. Ытлашшипех тесен те юрать.
– Тавах сире калаçушăн. Эппин, малашне те ĕçĕрсем ăнса пыччăр.
– Апла усас килмест. Ĕçлесчĕ-ха. Тăваллах талпăнасчĕ...
В.МИХАЙЛОВ калаçнă.