Публикации » Вăрмар поселокĕ капăрлантăр

о Вырăнти хăй тытăмлăх

Вăрмар поселокĕ капăрлантăр

Поселок илемĕшĕн тăрăшса тĕп урамра (эпир ăна "Арбат" тетпĕр) темиçе çул хушши ĕнтĕ йывăç хунавĕсем, чечексем лартса ỹстеретпĕр, тирпей-илем кĕртес тĕлĕшпе тĕрлĕрен ĕçсем туса ирттеретпĕр. Анчах та темĕн чухлĕ тăрăшсан та, пурнăçланă ĕç сая каять. Ирĕкре çỹрекен качакасем вĕсене таптаса-хуçса, кăшласа пĕтереççĕ, сиен кỹреççĕ.

Çав сăлтавпах ĕнтĕ Вăрмар хула тăрăхĕн пуçлăхĕ А.Васильев поселокра пурăнакан, качака е урăх выльăх усракан çынсен хуçисене пухса канашлу ирттерчĕ. Качака тытакансене вĕсене ĕнесемпе пĕрле кĕтĕве яма е кăкарса усрама сĕнчĕ. Ирĕкре çỹрекен качакасен хуçисене кỹнĕ тăкакшăн явап тыттарма пулни çинчен пĕлтерчĕ.

"Вăрмар поселокĕ тахçантанпах ешерсе симĕс тум тăхăнмалла, йывăç-тĕмсем кашласа лармалла. Пирĕн вара апла мар. Поселок илемĕшĕн кашниех тăрăшмалла. Çын тунă ĕçе хисеплеме пĕлмелле. Хамăр поселок илемĕшĕн хамăрах тăрăшар" тесе вĕçлерĕ хăйĕн сăмахне Андрей Васильевич.