Публикации » Йỹнни - йỹнĕçтерет

Йỹнни - йỹнĕçтерет

Раççей Федерацийĕ çывăх вăхăтра Тĕнчери суту-илỹ организацине кĕме хатĕрленет. Тулли праваллă член пулас тесен пирĕн çĕр-шыври тавар сутакансен тĕнче шайĕнчи йĕркесене тытса пымалла.

Видео-ауди кассетăсем сутас ĕçе те пырса тивет çакă. Акă Вăрмар районĕн прокуратури ку енĕпе суту-илỹ ĕçченĕсем саккуна мĕнле пăхăнса пынине тĕрĕслесе профилактика ĕçĕсем ирттерчĕç. Видео-ауди продукцийĕ сутакан уйрăм предпринимательсемпе районти шалти ĕçсен пайĕн сотрудникĕсем пĕрле ăнлантару ĕçĕсем ирттерчĕç, саккуна пăссан мĕнле яваплăх тытма лекесси пирки асăрхаттарчĕç. Апла пулин те каланă сăмахсене пурте ăша хывасшăн мар пулмалла.

Çапла вара Вăрмар поселокĕнче ирттернĕ рейдра Л., И., В. уйрăм предпринимательсенчен 81 DVD диска автор прависене пăсса çыртарнăшăн экспертизăна ярса панă.

Май уйăхĕнче икĕ уйрăм предприниматель киоскĕнче иккĕлентерекен 34 ауди кассета тата 32 компакт-диск туртса илнĕ. Вĕсем пирки административлă ĕç пуçарнă, материалсене Вăрмар районĕнчи пĕрремĕш участокăн мировой судйине пăхса тухма ярса панă.