Публикации » Юрла-юрла е куссуль витер "чун пана" эрешсем

Муркаш тăрăхĕнче ал ĕç ăсти пайтах. Вĕсенчен чылайăшĕ пирки «Хыпарта» та каласа кăтартнă. Паян акă Сосновкăра пурăнакан Елена Макаровăпа паллаштарасшăн. Унăн çуртĕнче тĕрĕ тĕнчи хуçаланать. Хăшĕ çапла та хушса хума пултарĕ: «Тивĕçлĕ канура пулĕ, вăхăт ирттермелле айкашать ĕнтĕ е пĕчченлĕх тыткăнне лекесрен шикленет».

Елена Ильинична чăнах та пенсире. Тĕрĕ ĕçне шкулта вĕреннĕ çулсенчех килĕштернĕ. Çакăншăн Вера Григорьева пионер вожатăя тав тăвать. Шăпах вăл хавхалантараканĕ пулнă иккен. «Ун чухне лавккара мулине те, канва та, хитре тутăр та тупса илме çукчĕ, - аса илет Кивĕ Матьăкра кун çути курнă, Сосновкăна качча тухнă Елена Макарова. - Самани мĕнле килсен те хĕр-упраç илĕртÿллĕ пулас тенех. Штапель пусма çине тĕрлеттĕмĕр те тутăр туса çыхаттăмăр».

Пĕчченлĕх «серепи» те хăратмасть ăна. Пилĕк ача - икĕ хĕрпе виçĕ ывăл - пăхса çитĕнтернĕ вăл. Пурнăç кустăрми яланах пĕр тикĕс шунă тени йăнăш пулĕччĕ. Кĕçĕн ачи тăхăр уйăхра чухне мăшăрĕ çĕре кĕнĕ. 33-ри хĕрарăм пилĕк ачапа юлать. Тепри, çемçе кăмăлли, хуçăлса ÿкме те пултарĕ. Елена вара çĕр çине йăтăнса аннă хуйхине чăтнах: мăшăрĕн сăнарне ывăлĕсемпе ачисенче курнă, вĕсемшĕн пурăннă. Çак вăхăтра аллине йĕппе çип илсе карас куçлă пусмана эрешлени те чуна пусăрăнтарнах ĕнтĕ.

Халĕ хĕрĕсем качча тухнă, пĕр ывăлĕ авланнă, тĕп килте икĕ ывăлĕ пурăнать. Саша - газ операторĕ, çулла Ильич ячĕллĕ хуçалăхра водительте ĕçлет. Юра вара вăхăтран-вăхăт Мускава та кайса килет.

-Çак хĕлле пилĕк ĕç тĕрлерĕм. Тепĕр чух пĕрне пурнăçлама темиçе уйăх кирлĕ. Ас тăватăп: виççĕмĕш ачана çуратсан «Вăрманти пăшисем» кавире пуçланăччĕ, ăна вĕçличчен икĕ çул иртсе кайрĕ, ачасем те пĕчĕкчĕ çав ун чухне, - тет Елена Ильинична. - Мана çут çанталăка, çынна сăнласа кăтартма килĕшет. Турăшсем те кăсăклантараççĕ. Вĕсене тĕрленĕ чухне чунра лайăх, çăмăл, лăпкă.

Елена Макаровăн ĕçĕсемпе ял çыннисем çеç мар, районта, республикăра пурăнакансем те паллашнă. Тĕрлĕ курава илемлетеççĕ вĕсемпе.